2025 წლის იანვარ-ივლისში, საქართველოს სახელმწიფო ბიუჯეტში პრივატიზაციიდან 204 მლნ 803 ათასი ლარი შევიდა, რაც ფინანსთა სამინისტროს ხაზინის მონაცემებით, 9 თვის საპროგნოზო მოცულობის (228 მლნ ლარი) 89.8%-ია.
ხაზინის ინფორმაციით, შემოსულობებმა ძირითადი აქტივების (მაგალითად: შენობა-ნაგებობა) გაყიდვიდან შეადგინა 108 მლნ 732 ათასი ლარი ანუ საპროგნოზო მოცულობის (132 მლნ ლარი) 82.4%;
არაწარმოებული აქტივების გაყიდვიდან მიღებულმა შემოსულობებმა კი შეადგინა 96 მლნ 72 ათასი ლარი, რაც საპროგნოზო მოცულობის (96 მლნ ლარი) 100.1%-ია; მათ შორის: მიწის გაყიდვიდან მიღებული შემოსულობის საპროგნოზო მოცულობამ შეადგინა 17 მლნ 700 ათასი ლარი, ფაქტობრივად მიღებული იქნა 17 732.4 ათასი ლარი, ანუ საპროგნოზო მოცულობის 100.2%; ხოლო რადიოსიხშირული სპექტრით ლიცენზიის სარგებლობით მიღებულმა შემოსულობებმა შეადგინა 78 მლნ 340 ათასი ლარი ანუ საპროგნოზო მოცულობის (78,3 მლნ ლარი) 100.1%.
ცნობისთვის: ძირითადი აქტივი წარმოადგენს წარმოებულ აქტივს, რომლის გამოყენება წარმოებისა და მომსახურების პროცესში ხდება ერთ წელზე მეტი დროის განმავლობაში მრავალჯერადად ან განუწყვეტლივ, ხოლო არაწარმოებულ აქტივს წარმოადგენს ბუნებრივად წარმოქმნილი ან სამართლებრივი თუ ბუღალტრული ოპერაციით შექმნილი აქტივი, რომლის მიმართაც შესაძლებელია საკუთრების დაცვის უზრუნველყოფა. მაგალითად: მიწა, წიაღისეული და სხვა ბუნებრივი აქტივები.
შეგახსენებთ: 2025 წლის პრივატიზაციის გეგმა მთლიანობაში 300 მილიონ ლარს შეადგენს. აქედან რადიოსიხშირული სპექტრის ლიცენზიიდან მისაღები შემოსავალი 87 მილიონი ლარია.
