საქართველოში თხილის აღების სეზონი დაიწყო, თუმცა როგორც მწარმოებლები და ექსპორტიორები ამბობენ, წელს შარშანდელივით მაღალი ფასი არ იქნება. მიზეზი თურქეთია, რომელიც საქართველოში თხილის ფასს განსაზღვრავს და რადგან წელს თურქეთში გაზრდილ მოსავალს ელიან, ეს ქართულ თხილზე მოთხოვნას და შესაბამისად ფასს ამცირებს.
თხილის მწარმოებელთა ასოციაციის გამგეობის თავმჯდომარე მერაბ ჭითანავა ამბობს, რომ წელს შარშანდელთან შედარებით 5-7%-ით მეტ მოსავალს ელოდებიან.
კვლავ პრობლემად რჩება აზიური ფაროსანა და თხილის ხმობა, რომელმაც ზაფხულში საგრძნობლად იმატა. მერაბ ჭითანავა ფერმერებს მოუწოდებს, განსაკუთრებული ყურადღება მიაქციონ მოსავლის სწორად დაბინავებას, რადგან პროდუქციის საბოლოო ხარისხი სწორედ აგვისტოში მის დროულ შრობასა და საწყობებში განთავსებაზეა დამოკიდებული.
