საგალანტერიო აქსესუარების მაღაზია Rainbow beads-ის 100%-იანი წილი იყიდება. შეთავაზების ჯამური ღირებულება $30 000-ია (70 000 ლარი).
როგორც კომპანიის ერთ-ერთმა დამფუძნებელმა და დირექტორმა გიორგი დოლიძემ „კომერსანტთან“ საუბარში აღნიშნა, ბიზნესის გაყიდვა პროდუქტის გასავითარებლად დამატებითი ინვესტიციის ვერ მოძიების გამო გადაწყდა.
მისი განმარტებით, შეთავაზებაში შედის ბიზნესის რამდენიმე აქტივი, მათ შორის ონლაინ გაყიდვების საიტი rainbowbeadsshop.com, რომელიც Google-ს საძიებო სისტემაში მარტივად იძებნება.
„გასაყიდ შეთავაზებაში შედის კომპანიის ვებგვერდი, რომელიც საკმაოდ ცნობილია და დაგუგვლის დროს ერთ-ერთი პირველია, რომელიც იძებნება. ასევე იყიდება სოციალური ქსელის გვერდი 26 000 „ლაიქით“ - მომხმარებლით. გარდა ამისა, შეთავაზებაში შედის ინვენტარი, 4 დახლი, 2 თარო და პროდუქცია“, - აღნიშნა გიორგი დოლიძემ.
მისივე ინფორმაციით, სულხან ცინცაძის ქუჩაზე არსებული ფართი, რომელსაც მაღაზია თვეში საკმაოდ იაფად - 600 ლარად ქირაობს, მომავალ მფლობელს შეუძლია გამოიყენოს, ქირავნობის ხელშეკრულების გაგრძელების გზით.
კომპანიას უკვე ჰქონდა რამდენიმე გამოხმაურება Rainbow beads-ის შეძენის მსურველთაგან, თუმცა, როგორც გიორგი დოლიძემ განაცხადა, შეთანხმება ვერ შედგა.
„ერთ-ერთს დაინტერესებულ პირს ეგონა, რომ ამ ფასად ბიზნესი უძრავი ქონებიანად იყიდებოდა, მეორეს კი პირიქით, უძრავი ქონების შეძენა სურდა ბიზნესთან ერთად, რაც ვერ გავიგე, რას ნიშნავდა. ამ ეტაპზე ისევ ველოდებით მყიდველის გამოჩენას“, - აღნიშნა გიორგი დოლიძემ.
