ომით გამოწვეული ზრდა არასდროს არის ჯანსაღი - ამის შესახებ "არსის" გენერალური დირექტორი ბესო ორთოიძე BMG-სთან აცხადებს და უძრავი ქონების ბაზარზე რეგიონული კონფლიქტების გავლენას აფასებს.
მისი თქმით, ახლო აღმოსავლეთში არასტაბილურობამ შესაძლოა, საქართველოს უძრავი ქონების ბაზარზე ზრდის მიმართულებით გავლენა მოახდინოს, თუმცა, გარე ფაქტორებით გამოწვეული ფასების ნახტომისებური ზრდა ბაზრისთვის სასურველი არ არის.
„ლოგიკურია, რომ გავლენა იქონიოს, გამომდინარე იქიდან, რომ ზოგადად ეგ რეგიონი [საქართველოში] ისედაც აქტიურია. თუ შევხედავთ უძრავი ქონების გაყიდვებს არარეზიდენტებზე - ისრაელი და ყურის ქვეყნები ისედაც აქტიურობით გამოირჩეოდა. ჯერჯერობით, ჩვენი კომპანიის მაგალითზე, რაიმე ცვლილება არ ჩანს, თუმცა, ლოგიკურია, რომ მოკლევადიან ჭრილში, თუ ეს კონფლიქტი გრძელვადიან ფაზაში არ გადავიდა, გარკვეულ ეფექტს მოიტანს ტრანზაქციების კუთხით“, - ამბობს ბესო ორთოიძე BMG-სთან.
მისივე შეფასებით, სექტორისთვის პრიორიტეტული მდგრადი განვითარებაა და არა ომით გამოწვეული აჟიოტაჟური მოთხოვნა, რომელმაც რუსეთ-უკრაინის ომის დაწყებისას ფასების მკვეთრი ზრდა გამოიწვია.
„პირადად მე არ ვისურვებდი [ასეთ ზრდას], იმიტომ რომ ეს არ არის ხოლმე ბუნებრივი ზრდა. ასეთი ფაქტორები ხელს უშლის მდგრად განვითარებას. როდესაც ბაზარი გარე ფაქტორებით იზრდება, ეს არასოდეს არის ჯანსაღი. ჩვენ ვნახეთ, რომ რუსეთ-უკრაინის ომის ფონზე ძალიან სწრაფად მოიმატა როგორც გასაყიდმა ფასმა, ასევე თვითღირებულებამ. ეს პროცესი გარკვეული რისკების შემცველია. კარგია, რომ ბოლო პერიოდში ბაზარმა ამას გაუძლო, ფასები შენარჩუნდა და გვაქვს სტაბილურობა. ნებისმიერი გარე ფაქტორი, იქნება ეს დადებითი თუ უარყოფითი გავლენა, საბოლოოდ შეიძლება ცუდად აისახოს ბაზარზე, ამიტომ, ომს არავის ვუსურვებთ“, - აღნიშნავს „არსის“ გენერალური დირექტორი.
მისი თქმით, კონფლიქტების გავლენა მხოლოდ მოთხოვნაში არ გამოიხატება; მნიშვნელოვანი გამოწვევაა სამშენებლო მასალების გაძვირებაც.
„არ უნდა დაგვავიწყდეს, რომ როცა რუსეთ-უკრაინის ომი მწვავდებოდა, მასალებზე ფასები ძალიან სწრაფად და მკვეთრად გაიზარდა. რა თქმა უნდა, ახლაც არის გარკვეული რისკები, გამომდინარე იქიდან, რომ ჩინეთის ბაზრიდან გარკვეული მასალები მოდის. ამანაც შეიძლება მოახდინოს გავლენა თვითღირებულებაზე, თუმცა ვფიქრობ, ეს გავლენა არ იქნება ისეთი მასშტაბური, როგორიც რუსეთ-უკრაინის კონფლიქტის დროს იყო“ - ამბობს ბესო ორთოიძე.
“თიბისი კაპიტალის” შეფასებით, იმ შემთხვევაში თუ კონფლიქტი მოკლევადიან პერიოდში დასრულდება, შესაძლოა, 2026 წელი უძრავი ქონების ბაზრისთვის უფრო პოზიტიური აღმოჩნდეს, ვიდრე ეს კონფლიქტამდე არსებულ საბაზისო სცენარში იყო გათვალისწინებული. ეს ძირითადად ახლო აღმოსავლეთიდან პოტენციური მიგრაციით შეიძლება იყოს გამოწვეული, რაც დადებითად იმოქმედებს უძრავი ქონების მოთხოვნაზე, როგორც გაქირავების, ისე გაყიდვების კუთხით.
იმ შემთხვევაში თუ კონფლიქტი გახანგრძლივდება და რეგიონში რისკები გაიზრდება, კონფლიქტის გავლენა საქართველოს უძრავი ქონების ბაზრისთვის შესაძლოა უარყოფითი აღმოჩნდეს. ხანგრძლივ პერიოდში გაურკვევლობა მომხმარებლის მოლოდინებზე უარყოფითად მოქმედებს, რაც ზეწოლას მოახდენს როგორც ბინების გაყიდვებზე, ისე ფასების ზრდის ტემპზე. შედარებით ნეგატიურ სცენარში, ეს შესაძლოა ტრანზაქციების მოცულობისა და ბინების გასაყიდი ფასების შემცირებაშიც აისახოს.
