ბალტიისპირეთის ბაზრის შემდეგ, მობილური გიდი „ბილიკი“ ინდოეთის ბაზრის ათვისებას გეგმავს, ამის შესახებ „კომერსანტის“ ეთერში აპლიკაცია „ბილიკის“ დამფუძნებელმა თორნიკე ცირამუამ განაცხადა.
„გვაქვს მოლაპარაკებები ინდოეთის მხარესთან, როგორც ინვესტორებთან, ისე პარტნიორებთან. ჩვენთვის ინდოეთი ძალიან მნიშვნელოვანი და საინტერესო ბაზარია და, ვფიქრობ, ძალიან მალე სიახლეები ინდოეთის მიმართულებითაც იქნება და „ბილიკი“ იქაც დაარჭობს თავის დროშას“, - აცხადებს თორნიკე ცირამუა.
„ბილიკის“ დამფუძნებელმა „კომერსანტთან“ დაწვრილებით ისაუბრა ბალტიისპირეთის მხარესთან ხელშეკრულების გაფორმებისა და ამ მიმართულებით გაფართოების მნიშვნელობაზე.
„რამდენიმე კვირის წინ, ბათუმში ტურისტული კონფერენცია ჩატარდა, სადაც წარვადგინეთ „ბილიკი“ და მისი როლი ტურიზმის მიმართულებით. ამ კონფერენციაზე ჩამოსული იყვნენ ბალტიისპირელები. პარასკევს შევხვდით ერთმანეთს და ოთხშაბათს უკვე გავაფორმეთ ხელშეკრულება. ძალიან სწრაფად, 5 დღეში შევთანხმდით იმაზე, რომ „ბილიკი“ შევიდოდა ბალტიისპირეთში. ჩვენს აპლიკაციაში განთავსდება მთელი ტურისტული პოტენციალი, რაც სამ ქვეყანას - ლიეტუვას, ლატვიას და ესტონეთს გააჩნია. ეს მოიცავს ციფრულ ტურებს და ვრცელ ინფორმაციას. აქ თავმოყრილია 200-მდე ციფრული ტური და 3500 კმ-იანი ტურისტული მარშრუტი. ეს პროექტი გაერთიანებულია ევროკავშირის ქოლგის ქვეშ“, - აცხადებს თორნიკე ცირამუა.
მისი თქმით, „ბილიკმა“ დასვა თავისი დროშა ევროკავშირში და ეს „ბილიკის“ პირველი ოფიციალური გასვლაა საერთაშორისო ბაზარზე.
„ეს არის ჩვენთვის კიდევ ერთი ახალი ფანჯარა, ახალი შესაძლებლობა. ჩვენი დროშა დავსვით ევროკავშირში. ჩვენი მხრიდან შევედით ევროკავშირში“, - აცხადებს თორნიკე ცირამუა.
შეგახსენებთ, რომ „ბილიკი“ ეს არის გლობალური ტურისტული მარშრუტების საბაზრო სივრცე, სადაც მომხმარებელს შეუძლია თავად შექმნას თავისი ციფრული ტური.
„ბილიკი“ არის მობილური გიდი, რომელიც ყველა მოგზაურის ტელეფონში უნდა იყო და ყველა მოგზაურის მეგზური უნდა გახდეს. მნიშვნელოვანია, რომ „ბილიკი“ ოფლაინაც გამოიყენება, ინტერნეტის გარეშე მუშაობს. ამით ვზრდით უსაფრთხოებას და ხელს ვუწყობთ მდგრადი ტურიზმის განვითარებას,“ - ამბობს თორნიკე ცირამუა.
მისი თქმით, სტატისტიკად გამომდინარე, „ბილიკის“ მომხმარებლები ძირითადად კავკასიის რეგიონებიდან, პოლონეთიდან, გერმანიიდან და ახლა უკვე ბალტიისპირეთიდან არიან. ბაზარი საკმაოდ დივერსიფიცირებულია და ემატებიან მოგზაურები, როგორც ევროკავშირის ქვეყნებიდან, ისე ახლო აღმოსავლეთიდან.
