„დიდი ალბათობით, აფთიაქების მიერ ეპილეფსიის სამკურნალო მედიკამენტებზე შესაძლო ხელოვნური დეფიციტის შექმნის საკითხზე კონკურენციის სააგენტო მოკვლევას დაიწყებს“, - ამის შესახებ სააგენტოს ხელმძღვანელმა ირაკლი ლექვინაძემ განაცხადა.
მისი თქმით, ამ ეტაპზე კომპანიებისგან ახსნა-განმარტებების მიღება ხდება, რის შემდეგაც მოკვლევის დაწყების საკითხი გაირკვევა.
„საკმარისი ინფორმაციაა იმისთვის, რომ დავიწყოთ პროცესი. ეს ნიშნავს კომპანიებისგან ახსნა-განმარტებების მიღებას და საქმის მოკვლევის შესაძლო წარმოებას შესაძლო შეთანხმებული ქმედების ან დომინანტური მდგომარეობის შესაძლო არასათანადო გამოყენების მიზნით. ჩვენთვის საინტერესოა გაირკვეს, თუ რა იყო მიზეზი, როდესაც ერთდროულად რამდენიმე ფარმაცევტულ ქსელში პრაქტიკულად მედიკამენტი არ იძებნება და ამავდროულად საწყობებში და მარაგებში აღნიშნული პროდუქცია არსებობს. ერთი შეხედვით და წინასწარი შეფასებით, ეს ხვდება იმ საინტერესო საკითხების ჩამონათვალში, რომელიც შესაძლოა მოდიოდეს კონკურენციის კანონმდებლობასთან წინააღმდეგობაში“,- აღნიშნა ირაკლი ლექვინაძემ.
შეგახსენებთ, რომ რეგულირების სააგენტოს მიერ გუშინ გავრცელებული განცხადების თანახმად, მედიკამენტებზე რეფერენტული ფასების ამოქმედების შემდეგ, რამდენიმე, დიდი ფარმაცევტული ქსელის მხრიდან მორიგი არაკეთილსინდისიერი ქმედება დაფიქსირდა - კერძოდ, ეპილეფსიის სამკურნალო პრეპარატზე უწყებამ სავარაუდო ხელოვნური დეფიციტის შექმნის ფაქტები გამოავლინა.
საუბარია მედიკამენტზე „დეპაკინი ხრონო”, რომელიც სხვადასხვა ტიპის ეპილეფსიის სამკურნალოდ ბავშვებსა და მოზრდილებში გამოიყენება. რეგულირების სააგენტომ, ფარმაცევტული კომპანიების ინსპექტირების შედეგად, დაადგინა, რომ “დეპაკინი ხრონო” (300მგ, 500მგ) კომპანიებს მარაგში აქვთ, თუმცა, სავარაუდოდ, ხელოვნური დეფიციტის შექმნის მიზნით, სააფთიაქო ქსელებში არ ხდებოდა მათი რეალიზაცია.
ხელოვნური დეფიციტის შექმნას უარყოფენ ამ ქმედებაში ეჭვმიტანილი კომპანიები. ერთადერთი კომპანია, რომელმაც ამ საკითხზე განმარტება გააკეთა და გავრცელებული განცხადებით უარყო ბრალდებები, „გეფაა.“ სექტორის პოზიცია კი ფარმაცევტული კომპანიების ასოციაციამ გაახმოვანა.
ასოციაცია საუბრობს იმაზე, რომ მედიკამენტი ქვეყანას მწარმოებელმა შეზღუდული რაოდენობით მიაწოდა.
„სამწუხაროდ, ჯანდაცვის სამინისტროს სამედიცინო და ფარმაცევტული საქმიანობის რეგულირების სააგენტომ ეპილეფსიის სამკურნალო პრეპარატ „დეპაკინ ხრონზე“ სავარაუდო ხელოვნური დეფიციტის შექმნაზე ფაქტების გამოვლენის შესახებ ინფორმაცია გაავრცელა გადაუმოწმებელ მონაცემებზე დაყრდნობით.
მეტიც, ფარმაცევტული ასოციაციის წევრებზე ბრალის დადება მოხდა არაკეთილსინდისიერ შეთანხმებებსა ან დომინირებული მდგომარეობის არასათანადოდ გამოყენების ფაქტზე მხოლოდ და მხოლოდ სავარაუდო ინფორმაციასა და დაშვებების საფუძველზე. ფარმაცევტული კომპანიების ასოციაცია აცხადებს, რომ მედიკამენტი „დეპაკინი ხრონო“, რომელიც წარმოებულია კომპანია „სანოფის“ მიერ, მწარმოებლის მხრიდან შეფერხებული საწარმოო პროცესებიდან გამომდინარე, ბაზარზე იქნა იმპორტირებული მცირე რაოდენობით და მწარმოებელმა მხარემ ვერ მოახერხა საჭირო რაოდენობით მედიკამენტის მოწოდება დამკვეთებისთვის. ასევე, შეფერხებულია აღნიშნული მედიკამენტის იმპორტი პარალელური რეჟიმით თურქეთიდანაც, ვინაიდან თურქული მხარე ვერ უზრუნველყოფს მედიკამენტის რეფერენტულ ფასში მოწოდებას.
სრული პასუხისმგებლობით ვაცხადებთ, რომ მედიკამენტი „დეპაკინი ხრონო“ საქართველოს ტერიტორიაზე იმპორტირებისთანავე იყო მიწოდებული როგორც კერძო, ასევე ქსელური სააფთიაქო დაწესებულებებში რეალიზაციისათვის, მაგრამ, შეზღუდული და არასაკმარისი რაოდენობიდან გამომდინარე, მოხდა აღნიშნული მედიკამენტის სწრაფი ამოყიდვა.
ფარმაცევტული კომპანიების ასოციაცია გმობს მისი წევრი კომპანიების მიმართ მორიგ ჯერზე ბრალდებებს და ეჭვობს, რომ წამოწყებული კამპანია სექტორის რეპუტაციის შელახვისკენ არის მიზანმიმართული, რაც დარგის თითოეული წევრისთვის ყოვლად მიუღებელი და დასაგმობია.
კიდევ ერთხელ ვაცხადებთ, რომ ასოციაციის წევრებისათვის მიუღებელია და ემიჯნებიან ბიზნესის არაეთიკურ წარმოებას, მით უმეტეს პაციენტების ხარჯზე და მუდმივად ზრუნავენ, რომ მათ მიერ გაწეული მომსახურება შეესაბამებოდეს საერთაშორისო სტანდარტებს, მომხმარებლებს მიეწოდოს ხარისხიანი, უსაფრთხო და ეფექტიანი ფარმაცევტული პროდუქტი“, – ნათქვამია განცხადებაში.
