რთველის სუბსიდირება 2023 წელსაც გაგრძელდება, ამჯერად სახელმწიფო ყურძენს 20 თეთრით დაასუბსიდირებს და ერთი კილოგრამი თეთრი ყურძნის ფასი, სულ მცირე, 90 თეთრი იქნება. სახელმწიფოს საკუთრებაში არსებულმა „შპს „მოსავლის მართვის კომპანიამ“ 2023 წლის რთვლისთვის საჭირო საქონლისა და მომსახურების სახელმწიფო შესყიდვები უნდა განახორციელოს გამარტივებული შესყიდვის საშუალებით, რომლის ღირებულებაა 60 000 000 ლარია.
სახელმწიფომ რთველის სუბსიდირება ჯერ კიდევ 15 წლის წინ დაიწყო. 2008 წელს, როდესაც რუსეთმა ქართულ ღვინოზე ეკონომიკური ემბარგო დააწესა, მთავრობამ გადაწყვიტა, რომ ვინაიდან ღვინის ძირითადი საექსპორტო ბაზარი რუსეთის ფედერაცია იყო, ემბარგო ქართულ მეღვინეობას უდიდესი სოციალური და ეკონომიკური ზიანი მოუტანდა და დახმარება აუცილებელი იყო.
2008-2012 წლებში ყურძნის სუბსიდირების პროგრამა მცირე მასშტაბის იყო და ბიუჯეტიდან რთვლისთვის საშუალოდ 6-7 მილიონი ლარი იხარჯებოდა. უფრო კონკრეტულად, მაშინ 1 კგ რქაწითლის ჯიშის ყურძნის დასუბსიდირება ქვეყანას 0.15 ლარი, საფერავის ჯიშის 0.25 ლარი და ალექსანდროულის კი 1 ლარი უჯდებოდა.
ხელისუფლების ცვლილების შემდეგ, 2013 წლიდან სუბსიდირების მოცულობაც შეიცვალა. 2013-2017 წლებში ბიუჯეტს რქაწითლის სუბსიდირება 0.4 ლარი, საფერავის ჯიშების 0.35 ლარი უჯდებოდა, მუჯურეთულ/ალექსანდროულის სუბსიდირებისთვის გამოყოფილი 1 ლარი კი უცვლელი დარჩა. ბიუჯეტიდან ჯამურად გამოყოფილი თანხის მოცულობაც გაიზარდა და 32 მილიონ ლარი გახდა.
2017 წლიდან მთავრობა ყურძნის ფასის სუბსიდირებიდან გავიდა, თუმცა ჭარბი ყურძნის შესაძენად სახელმწიფო საწარმოებს თანხა, ჯამში 17 მლნ ლარი მაინც გამოუყო. სუბსიდია მხოლოდ ალექსანდროულსა და მუჯურეთულზე შენარჩუნდა და ის 1 კგ. ყურძენზე 2 ლარი იყო. სახელმწიფოსგან კომპენსაცია (1კგ. ყურძენზე 0.35 ლარი) იმ ღვინის კომპანიებმა მიიღეს, რომელთაც საბრენდე სპირტის და კონცენტრირებული ყურძნის ტკბილის დასამზადებლად, 1 კილოგრამი ყურძენი (რქაწითელი და კახური მწვანე) არანაკლებ 70 თეთრად შეისყიდეს.
2018-2019 წლებში მთავრობამ სახელმწიფო საწარმო „აკურას“ 10-10 მილიონი ლარი გამოუყო. თუმცა 2019 წელს გამოყოფილი 10 მლნ საკმარისი არ აღმოჩნდა და ჭარბი ყურძნის შესაძენად ჯამში 80 მლნ ლარი გახდა საჭირო.
2020 წელს, კოვიდპანდემიიდან გამომდინარე, საქართველოს მთავრობამ ყურძნის სუბსიდირებაში უკვე 87 მლნ ლარი გადაიხადა და 95 000 ტონა ყურძენი შეისყიდა. 2021 წელს რთვლის სუბსიდირებისთვის კი ჯამში 138 მლნ ლარი დაიხარჯა, სუბსიდიის ძირითადი თანხა სახელმწიფოს კუთვნილ შპს „მოსავლის მართვის“ კომპანიას ჩაერიცხა.
2022 წელს რთვლის სუბსიდირებისთვის 150 მლნ ლარი იყო გათვალისწინებული, შარშან განხორციელდა როგორც თეთრი ყურძნის, ასევე რაჭის ზონაში შავი ყურძნის ფასის სუბსიდირება და ბაზარზე დარჩენილი ჭარბი ყურძნის შესყიდვა.
საერთო ჯამში, 2008 წლიდან დღემდე, სახელმწიფომ რთველის სუბსიდირებაში 630 მლნ ლარზე მეტი დახარჯა.
