ევროკავშირმა 2026 წლის „ინკლუზიურობისა და მრავალფეროვნების ევროპული დედაქალაქების“ ჯილდოს გამარჯვებულები დაასახელა. წელს აღიარება უნგრეთის, ბელგიის, ნიდერლანდების, იტალიისა და ესპანეთის ქალაქებმა და მუნიციპალიტეტებმა მიიღეს — მრავალფეროვნების, თანასწორობისა და ინკლუზიური პოლიტიკის განვითარების მიმართულებით განხორციელებული პროექტებისთვის.
50 ათასზე მეტი მოსახლეობის მქონე ქალაქების კატეგორიაში ოქროს ჯილდო ბუდაპეშტის მერვე რაიონმა — იოზეფვაროშმა (Józsefváros) მიიღო. ვერცხლის ჯილდო ბელგიის ქალაქ ლევენს გადაეცა, ხოლო ბრინჯაო — ნიდერლანდების ქალაქ ლაიდენს. ჟიურიმ განსაკუთრებით გამოყო სოციალური თანასწორობის, უმცირესობების მხარდაჭერისა და ადგილობრივი თემების ჩართულობის მიმართულებით განხორციელებული პროგრამები.
ევროკომისიის განცხადებით, ჯილდოს მიზანია იმ ქალაქებისა და რეგიონების წახალისება, რომლებიც მრავალფეროვნებას განვითარების რესურსად აღიქვამენ და ცდილობენ, შექმნან გარემო, სადაც მოქალაქეები თანაბარ შესაძლებლობებსა და დისკრიმინაციისგან დაცულ სივრცეში ცხოვრობენ. კონკურსში ფასდებოდა ინიციატივები, რომლებიც ეხებოდა ეთნიკურ და რელიგიურ მრავალფეროვნებას, შეზღუდული შესაძლებლობის მქონე პირთა უფლებებს, ასაკობრივ თანასწორობასა და LGBTIQ+ თემის მხარდაჭერას.
ევროკომისიაში აცხადებენ, რომ თანამედროვე ევროპისთვის ინკლუზიურობა უკვე მხოლოდ სოციალური საკითხი აღარ არის და ის ქალაქების განვითარების, ეკონომიკური მდგრადობისა და დემოკრატიული მმართველობის ერთ-ერთ მთავარ მიმართულებად ყალიბდება.
