აშშ-ის სავიზო გარანტია საქართველოს მოქალაქეებისთვის ძალაში რჩება — მსოფლიო ჩემპიონატის ბილეთი გამონაკლისს არ ქმნის
აშშ-ში 2026 წლის ფეხბურთის მსოფლიო ჩემპიონატზე დასასწრები ბილეთის ქონა საქართველოს მოქალაქეებს არ ათავისუფლებს 5 000-დან 15 000 დოლარამდე სავიზო გარანტიის შესაძლო ვალდებულებისგან. ინფორმაცია რადიო თავისუფლებას თბილისში აშშ-ის საელჩომ დაუდასტურა.
საკითხი მას შემდეგ გახდა აქტუალური, რაც აშშ-ის სახელმწიფო დეპარტამენტის რუსულენოვან გვერდზე გავრცელდა პოსტი, სადაც თავდაპირველად საქართველო დასახელებული იყო იმ ქვეყნებს შორის, რომელთა გულშემატკივრებიც, FIFA PASS-ის სისტემით შეძენილი ბილეთის შემთხვევაში, სავიზო დეპოზიტისგან გათავისუფლდებოდნენ. მოგვიანებით პოსტი შესწორდა და საქართველოზე მითითება წაიშალა.
აშშ-ის საელჩოს განმარტებით, სავიზო დეპოზიტის, იგივე ფინანსური გარანტიის, მოხსნა საქართველოს მოქალაქე განმცხადებლებზე არ ვრცელდება. შესაბამისად, საქართველოს მოქალაქეებისთვის კვლავ ძალაში რჩება 2026 წლის 2 აპრილიდან ამოქმედებული წესი, რომლის მიხედვითაც B1/B2 კატეგორიის ვიზაზე განაცხადისას შესაძლოა მოთხოვნილი იყოს 5 000, 10 000 ან 15 000 დოლარის გარანტია. თანხის ოდენობა ინდივიდუალურად განისაზღვრება სავიზო გასაუბრების დროს.
აღნიშნული თანხა განმცხადებელს აშშ-ის სავიზო წესების დაცვისა და სამშობლოში დაბრუნების შემდეგ უბრუნდება. ამავე ცვლილებების ფარგლებში, საქართველოს მოქალაქეებზე აღარ გაიცემა აშშ-ის 10-წლიანი ვიზები.
2026 წლის მსოფლიო ჩემპიონატი 11 ივნისიდან 19 ივლისამდე აშშ-ში, კანადასა და მექსიკაში გაიმართება. საქართველოსთვის კი მთავარი პრაქტიკული დასკვნა ასეთია: ჩემპიონატის ბილეთი სავიზო პროცედურას არ აუქმებს და არც ფინანსური გარანტიის მოთხოვნისგან ათავისუფლებს.
წყარო: "რადიო თავისუფლება"
