სომხეთის ანტიკორუფციულმა სასამართლომ ერევნის „არარატის“ კონიაკის, ღვინისა და არაყის ქარხნის აქციების მართვა და შენახვა დროებით სახელმწიფოს გადასცა. საწარმო, რომელიც NOY-ის ბრენდის პროდუქციას აწარმოებს, ბიზნესმენ და ოპოზიციონერ პოლიტიკოს გაგიკ წარუკიანს ეკუთვნის.
გადაწყვეტილება სასამართლომ 2026 წლის 30 ივლისს, გენერალური პროკურატურის შუამდგომლობის საფუძველზე მიიღო. აქციებს სომხეთის რესპუბლიკის სახელით ეკონომიკის სამინისტრო მართავს. საქმე უკანონო წარმოშობის ქონების შესაძლო ჩამორთმევის შესახებ მიმდინარე წარმოების ფარგლებში განიხილება.
მნიშვნელოვანია, რომ სასამართლოს ამ ეტაპზე საწარმოს სახელმწიფოს საკუთრებაში საბოლოოდ გადაცემის გადაწყვეტილება არ მიუღია. სახელმწიფოს მხოლოდ აქციების მართვა და შენახვა გადაეცა, როგორც დროებითი უზრუნველყოფის ღონისძიება, საბოლოო გადაწყვეტილებამდე. პროკურატურა ქარხნის აქციების კონფისკაციას 2023 წლის ოქტომბერში შეტანილი სარჩელით ითხოვს.
იმავე სარჩელის ფარგლებში პროკურატურა 75 უძრავი ქონების, კიდევ ათი ქონების საბაზრო ღირებულების, 42 სატრანსპორტო საშუალებისა და 38 იურიდიულ პირში წილების ჩამორთმევასაც მოითხოვს. ფულადი მოთხოვნების საერთო მოცულობა დაახლოებით 105.9 მილიარდ სომხურ დრამს შეადგენს.
წარუკიანი 6 ივლისს დააკავეს, ხოლო მომდევნო დღეს სასამართლომ მას ორთვიანი წინასწარი პატიმრობა შეუფარდა. გამოძიება მას განსაკუთრებით დიდი ოდენობით თაღლითობასა და ფულის გათეთრებას ედავება. Reuters-ის ცნობით, საქმე ირანიდან დაახლოებით 21 მილიონი დოლარის ღირებულების ავტომობილების, ტექნიკის, საწვავისა და სხვა საქონლის სავარაუდოდ თაღლითური გზით შემოტანას უკავშირდება. წარუკიანის დაცვის მხარე ბრალდებებს უარყოფს და მათ პოლიტიკურად მოტივირებულად მიიჩნევს.
მანამდე, 15 ივლისს, ანტიკორუფციულმა სასამართლომ იმავე წარმოების ფარგლებში წარუკიანის კუთვნილი „არარატცემენტის“ აქციების მართვაც სახელმწიფოს გადასცა.
წყაროები:
https://civilnet.am/en/news/1012965
