Airbnb-მ განაცხადა, რომ აფართოებს სერვისების მიმართულებას და ამატებს ახალ კატეგორიას – ავტომობილით ტრანსფერს მსოფლიოს 125 ქალაქში.
კომპანია თანამშრომლობს Welcome Pickups-თან, რაც მომხმარებლებს საშუალებას აძლევს დაჯავშნოს კერძო ტრანსპორტი ისეთ ქალაქებში, როგორიცაა პარიზი, ბალი და მეხიკო სითი.
Airbnb-ის განცხადებით, ეს სერვისი ტესტირების რეჟიმში უკვე მუშაობდა წელს ევროპასა და აზიაში, სადაც ათასობით მომხმარებელმა ისარგებლა და საშუალო შეფასება 4.96 დაწერა. თუ მომხმარებელი დაჯავშნის საცხოვრებელს იმ ქალაქში, სადაც ეს სერვისი ხელმისაწვდომია, აპლიკაციის Trips ჩანართში ავტომატურად გამოჩნდება კერძო ტრანსპორტის წინასწარ შეკვეთის შესაძლებლობა. ასევე შესაძლებელია ჯავშნის დეტალების ნახვა და ცვლილებების შეტანა პირდაპირ აპიდან.
კომპანიის წარმომადგენლის თქმით, ეს სერვისები შექმნილია იმისთვის, რომ სტუმრის გამოცდილება გაუმჯობესდეს ჩამოსვლის მომენტიდანვე და არა უშუალოდ დაბინავების შემდეგ.
Airbnb გეგმავს წლის განმავლობაში სერვისის კიდევ უფრო გაფართოებას ახალ ქალაქებსა და ლოკაციებზე. სერვისების კატეგორია კომპანიამ გასულ ზაფხულს წარადგინა, პარალელურად, გამოცდილების გაფართოებასთან ერთად. იმ დროს მომხმარებლებს შეეძლოთ დაეჯავშნათ 10 სხვადასხვა ტიპის სერვისი, მათ შორის:
- შეფმზარეული
- ქეითერინგი
- მზა საკვები
- ფოტოგრაფია
- მასაჟი და სპა
- პერსონალური ვარჯიში
- თმის, ფრჩხილების და მაკიაჟის სერვისები
ეს სერვისები ხელმისაწვდომი იყო რვა ქვეყანაში.
ნოემბერში კომპანიამ ასევე გააფორმა პარტნიორობა Instacart-თან, რაც მომხმარებლებს საშუალებას აძლევს შეუკვეთონ საკვები პროდუქტები ამერიკის გარკვეულ ქალაქებში.
ახალი ფუნქციის დამატებით, Airbnb ცდილობს შექმნას სრულყოფილი სერვისების ეკოსისტემა მოგზაურებისთვის. კომპანია ასევე ექსპერიმენტებს ატარებს სასტუმროების დაჯავშნის მიმართულებითაც. თავად ბრენდის განცხადებით, ეს ძალიან დიდი შესაძლებლობაა და კომპანიას მისცემს საშუალებას გახდეს მომხმარებლის მოგზაურობის ნაწილი, მიუხედავად იმისა, თუ რა ტიპის საცხოვრებელს აირჩევს იგი.
