თეთრიწყაროს მუნიციპალიტეტის სოფელ ორბეთის განაშენიანების გენერალური გეგმა დამტკიცდა, - ამის შესახებ ინფორმაციას ორბეთში მდებარე დასახლების „სათიბეს“ მფლობელი ირაკლი გაფრინდაშვილი ავრცელებს.

ორბეთი საქართველოში პირველი სოფელი იქნება, რომელიც კერძო მესაკუთრეთა მიერ დამუშავებული განაშენიანების გეგმით განვითარდება.

როგორც ცნობილია, გეგმის კონცეფციაზე მუშაობა სამი წლის განმავლობაში მიმდინარეობდა.

კონცეფცია ორიენტირებულია ჯანსაღ ცხოვრებასა და დასვენებაზე ფოკუსირებული დასახლების შექმნაზე. კონცეფცია მოიცავს სამ ძირითად ხედვას: ინფრასტრუქტურის ოპტიმალურ გადაწყვეტას (კომერციული სივრცეების მოწყობა, მიზიდულობის ობიექტების უზრუნველყოფა და მომსახურების ობიექტების გაჩენა), დასაქმების და ცხოვრების ხელშეწყობას (კომუნალური სერვისების შექმნა, სააგარაკე დასახლების შესაბამისი სამუშოა ადგილების შექმნა, სოფლის მეურნეობის გააქტიურება), ჯანსაღი და აქტიური გარემოს შექმნას (გარემოს დაცვა, განაშენიანების მდგრადობის შენარჩუნება).

დოკუმენტში ვკითხულობთ, რომ წლებია ორბეთში არ არსებობს ერთიანი საინჟინრო ინფრასტრუქტურის სისტემა, დასახლება წერტილოვანი სისტემით მარაგდება, თუმცა ელექტროენერგიის გარდა სხვა კომუნალური ინფრასტრუქტურა ძირითადად ინდივიდუალურ მოწყობაზეა დამოკიდებული.

„სამშენებლო ტერიტორიები დაყოფილია ოთხ ტიპად:

უშენი ტერიტორია, სადაც მიწის ნაკვეთები დაყოფილია უსისტემოდ, ან საერთოდ არ არის დაყოფილი. განაშენიანება ნებადართულია მხოლოდ გდგ-ს საფუძველზე;

უშენი ტერიტორია, რომელიც დაყოფილია გარკვეული გეგმის საფუძველზე. განაშენიანება ნებადართულია როგორც გდგ-თი, ასევე მოწესრიგების სქემით, რომლის საფუძველზეც გაიცემა მიწის ნაკვეთის სამშენებლოდ გამოყენების პირობები;

უშენი ტერიტორია, რომელიც განთავსებულია არსებული ქუჩათა ქსელის ან გზების გასწვრივ, პირველ ზოლში. განაშენიანება ნებადართულია როგორც გდგ-თი, ასევე მოწესრიგების სქემით, რომლის საფუძველზეც გაიცემა მიწის ნაკვეთის სამშენებლოდ გამოყენების პირობები. ასევე შესაძლებელია ტერიტორიის განვითარება მხოლოდ მიწის ნაკვეთის სამშენებლოდ გამოყენების პირობებით, იმ შემთხვევაში, თუ გათვალისწინებული იქნება სიღრმეში მდებარე მიწის ნაკვეთებთან მისასვლელი სამანქანო გზის კანონმდებლობით დადგენილი სიგანე (სერვიტუტის ან დაურეგისტრირებელი ტერიტორიის ხარჯზე);

ნაშენი ტერიტორია სოფლის ცენტრალურ ნაწილში, რომლის განაშენიანება ნებადართულია მიწის ნაკვეთის სამშენებლოდ გამოყენების პირობებით. დოკუმენტაციის გრაფიკულ ნაწილში წარმოდგენილია სამშენებლო და არასამშენებლო ტერიტორიების ზონირების და ფუნქციური ზონების რუკა.

გეგმარებით ტერიტორიაზე სამშენებლო ზონები დადგენილია შემდეგნაირად:

 სასოფლო-სამოსახლო ზონა (შზ-1) მიენიჭება სოფლის ცენტრალურ ნაშენ ტერიტორიას, სადაც მდებარეობს ისტორიული განაშენიანება.

 ცენტრის ზონა (შზ-2) მიენიჭება თბილისი-მაგლისის და ორბეთი-თეთრიწყაროს გზების კვეთაზე მდებარე ტერიტორიას, სადაც უკვე არსებობს საზოგადოებრივი დანიშნულების ობიექტების (სკოლა, საბავშვო ბაღი, სავარჯიშო დარბაზი, მარკეტი, ადმინისტრაციული შენობა) კონცენტრაცია, ისევე, როგორც არსებული ეკლესიის ტერიტორიას. ცენტრის ზონა მიენიჭა ასევე ორ მიწის ნაკვეთს, რომლებიც განთავსებულია საპროექტო ტერიტორიის ჩრდილოეთით, თბილისი-მანგლისი საავტომობილო გზის გასწვრივ, სექტორები 5 და 6 ის აღმოსავლეთით, სადაც შესაძლებელია სხვადასხვა სოციალური ინფრასტრუქტურის ობიექტების განთავსება.

 სააგარაკე-საცხოვრებელი ზონა (სზ-1) მიენიჭება იმ ტერიტორიებს, სადაც გამოხატულია სააგარაკე სახლებისთვის ტერიტორიის განვითარების ინტერესი და უკვე დაყოფილ- გასხვისებულია მიწის ნაკვეთები.

 საკურორტო-სარეკრეაციო ზონა (შზ-4) მიენიჭება იმ ტერიტორიებს, სადაც გამოხატულია განვითარების კერძო ინტერესი, მაგრამ მათი მცირე ზომის ნაკვეთებად დაყოფა ჯერ არ მომხდარა.

 საკურორტო-სარეკრეაციო ზონა 2 (შზ-6) მიენიჭება იმ ტერიტორიებს, რომლებიც დღეის მდგომარეობით წარმოადგენს სასოფლო-სამეურნეო ტერიტორიებს, თუმცა მათი ადგილმდებარეობიდან და არსებულ გზებთან მოსახერხებელი კავშირიდან გამომდინარე, იქნება მოთხოვნა მათი საკურორტო-სარეკრეაციო ფუნქციით განვითარებისა. შზ-6 განვითარდება შემცირებული ქალაქმშენებლობითი პარამეტრებით, რათა მოხდეს როგორც საკურორტო-სარეკრეაციო ფუნქციების განვითარების, ასევე სასოფლო-სამეურნეო ფუნქციის შენარჩუნების ხელშეწყობა“, - წერია გრგ-ს შეფასების ანგარიშში.

გარდა ამისა, დოკუმენტის თანახმად განსაზღვრულია განაშენიანების პარამეტრები, დადგენილია განაშენიანების მაქსიმალური სიმაღლეები როგორც არსებული განაშენიანების კვლევის საფუძველზე, ასევე სამომავლო მოთხოვნების გათვალისწინებით. ასევე დადგენილია განაშენიანების სიმჭიდროვის პარამეტრები, რომლის მიზანია თავიდან იქნეს არიდებული მოსახლეობის რაოდენობის გაზრდა, სატრანსპორტო ქსელის გადატვირთვა და სოციალური ინფრსტარუქტურის საჭიროების გაზრდა, რასაც გამოიწვევს ტერიტორიის მცირე ზომის მიწის ნაკვეთებად დაყოფა. 

ინდივიდუალური საცხოვრებელი სახლების სიმჭიდროვედ დადგინდა 10 სახლი ჰექტარზე. აღნიშნული პარამეტრი გულისხმობს სრული გდგ-ის არეალის ფართობს, გზების, გამწვანების და სხვა სივრცეების ჩათვლით. დადგენილი სიმჭიდროვის პარამეტრი (10 სახლი ჰექტარზე)გამორიცხავს სრული ტერიტორიის მცირე ზომის ნაკვეთებად დაყოფის შესაძლებლობას, თუმცა იძლევა იმის საშუალებას, რომ ტერიტორიაზე არსებობდეს მცირე ზომის ნაკვეთებიც.