მინდა მკაფიოდ ვთქვა: არ უნდა დაიღვაროს ცრემლები ირანის რეჟიმისთვის, რომელმაც სიკვდილი და რეპრესიები მოუტანა საკუთარ ხალხს, - ამის შესახებ ევროკომისიის პრეზიდენტმა ურსულა ფონ დერ ლაიენმა ევროკავშირის ელჩების კონფერენციაზე განაცხადა.
„ევროპამ ყურადღება უნდა გაამახვილოს რეალობაზე, რათა დაინახოს სამყარო ისეთი, როგორიც ის დღეს არის. მინდა ნათლად ვთქვა: არ უნდა დაიღვაროს ცრემლები ირანის რეჟიმისთვის, რომელმაც სიკვდილი და რეპრესიები მოუტანა საკუთარ ხალხს. მათ 17 000 საკუთარი ახალგაზრდა დახოცეს. ამ რეჟიმმა კი რეგიონში განადგურება და დესტაბილიზაცია გამოიწვია თავისი მოკავშირეების მეშვეობით, რომლებიც შეიარაღებულები არიან რაკეტებითა და დრონებით. ბევრმა ირანელმა, ქვეყნის შიგნით, ევროპასა და მსოფლიოში, იზეიმა აიათოლა ხამენეის გარდაცვალება. ისევე როგორც რეგიონში კიდევ ბევრმა ადამიანმა. ისინი იმედოვნებენ, რომ ეს მომენტი თავისუფალი ირანისკენ გზას გახსნის. ირანელი ხალხი იმსახურებს თავისუფლებას, ღირსებას და საკუთარი მომავლის გადაწყვეტის უფლებას - მაშინაც კი, თუ ვიცით, რომ ეს სავსე იქნება საფრთხითა და არასტაბილურობით ომის დროს და მის შემდეგ“, - აღნიშნა ევროკომისიის პრეზიდენტმა.
მისი თქმით, ახლო აღმოსავლეთის კონფლიქტის გავლენა უკვე რეალობაა.
„ჩვენ ახლა ვხედავთ რეგიონულ კონფლიქტს გაუთვალისწინებელი შედეგებით და ეს გავლენა დღეს უკვე რეალობაა - იქნება ეს ენერგეტიკისა და ფინანსების, ვაჭრობისა და ტრანსპორტის, თუ ადამიანების გადაადგილების კუთხით. კვიპროსში ბრიტანეთის სამხედრო ბაზები დაბომბეს - რომელთა მიმართაც მინდა კიდევ ერთხელ გამოვხატო ჩვენი სრული სოლიდარობა. ნატო-ს ჯარები დრონის ჩამოსაგდებად გამოიძახეს. ჩვენი მოქალაქეები ორმხრივი ცეცხლის ქვეშ არიან მოქცეულნი. ჩვენს პარტნიორებს თავს ესხმიან - და მე დავუკავშირდი ბევრ მათგანს მთელ რეგიონში, რათა გამომეხატა ჩვენი სოლიდარობა და მხარდაჭერა. გრძელვადიანი ზეგავლენა ეგზისტენციალურ კითხვებს ბადებს. ჩვენი საერთაშორისო წესებზე დაფუძნებული სისტემის მომავალზე, ან იმაზე, თუ როგორ პოულობს ევროპა ერთიანობას ამ სიტუაციებში. ეს ყველაფერი აჩვენებს, თუ რამდენად არასტაბილურია დღეს გლობალური სიტუაცია, რამდენად მრავალფეროვანია საფრთხეები და როგორ იმოქმედებს ევროპაზე ყოველთვის ის, რაც ხდება მსოფლიოში. ამიტომ, იდეა, რომ ჩვენ შეგვიძლია უბრალოდ უკან დავიხიოთ და თავი დავაღწიოთ ამ ქაოტურ სამყაროს, უბრალოდ მცდარია. მიმაჩნია, რომ სასიცოცხლოდ მნიშვნელოვანია ეს გავაცნობიეროთ მომავალი წლის საგარეო პოლიტიკის შედგენისას“, - აღნიშნა ურსულა ფონ დერ ლაიენმა.
