ბათუმის საზღვაო ნავსადგურის განცხადებით, 2026 წლის პირველ ნახევარში ნავსადგურმა ტვირთბრუნვა გაზარდა და ფინანსური სტაბილურობა გაამყარა. პორტის ადმინისტრაციის ინფორმაციით, განხორციელებული სატარიფო ცვლილებები წლის ბოლომდე დამატებით შემოსავლებს უზრუნველყოფს.
ნავსადგურის მენეჯმენტის ცნობით, 2026 წლის 1 მაისიდან საპორტო მოსაკრებლების ახალი ტარიფები ამოქმედდა, რის შედეგადაც პორტი წლის ბოლომდე დაახლოებით 1 მილიონი აშშ დოლარის დამატებით შემოსავალს ელოდება.
ამასთან, 2026 წლის 1 იანვრიდან გაიზარდა კარბამიდის ტერმინალის მომსახურების ტარიფიც. ადმინისტრაციის შეფასებით, აღნიშნული ცვლილება წლის ბოლომდე კიდევ დაახლოებით 200 ათასი აშშ დოლარის დამატებით შემოსავალს მოიტანს.
ბათუმის საზღვაო ნავსადგურის მონაცემებით, 2026 წლის პირველ ნახევარში საერთო ტვირთბრუნვამ 4.024 მილიონი ტონა შეადგინა, რაც 2025 წლის ანალოგიურ პერიოდთან შედარებით 8%-ით მეტია.
პორტის ადმინისტრაციის განცხადებით, მიღებული გადაწყვეტილებები ფინანსური სტაბილურობის განმტკიცებას, შემოსავლების დამატებითი წყაროების შექმნასა და ინფრასტრუქტურის განვითარების ხელშეწყობას ისახავს მიზნად.
„მიღებული ზომები ხელს უწყობს ფინანსური სტაბილურობის უზრუნველყოფას და ქმნის შემოსავლის დამატებით წყაროს ნავსადგურის ინფრასტრუქტურის განვითარების, მომსახურების ხარისხის ამაღლებისა და საინვესტიციო პროექტებისთვის“, – აღნიშნულია ბათუმის საზღვაო ნავსადგურის ადმინისტრაციის განცხადებაში.
