საქართველოს პრემიერ-მინისტრის, ირაკლი კობახიძის განცხადებით, მიმდინარე წლის I კვარტალში უმუშევრობა, წლიურ ჭრილში, 4 პროცენტული პუნქტით, 14%-მდე შემცირდა და 90-იანი წლების შემდეგ ისტორიულ რეკორდს მიაღწია. ამის შესახებ კობახიძემ პარლამენტში, პრემიერის ყოველწლიური ანგარიშის წარდგენისას ისაუბრა.
„ამ საკითხთან დაკავშირებითაც ხშირად გვესმის ხოლმე ჩვენ სპეკულაციები. მაგალითისათვის ავიღოთ უმუშევრობის მაჩვენებელი - რომ შევადაროთ ამ წლის პირველი კვარტალი წინა წლის პირველ კვარტალს, 4 პროცენტული პუნქტით შემცირდა უმუშევრობა საქართველოში და შეადგინა 14%, 18%-დან შემცირდა 14%-მდე. დამატებით დასაქმდა 130 000 ადამიანი და რეკორდული მაჩვენებელი გვაქვს დასაქმების კუთხით, 1,4 მლნ ადამიანია დღეს საქართველოში დასაქმებული, რაც არის ისტორიული რეკორდი 90-იანი წლების შემდეგ", - განაცხადა ირაკლი კობახიძემ.
პრემიერმა სიღარიბის მაჩვენებელზეც ისაუბრა და განაცხადა, რომ სიღარიბე საქართველოში 11,8%-მდეა შემცირებული, საბოლოო მიზანი კი მისი სრულად აღმოფხვრაა.
"რაც შეეხება სიღარიბეს, მინდა შეგახსენოთ, რომ 2012 წელს სიღარიბის მაჩვენებელი იყო 30%, შესაბამისად, 1,1 მლნ-ზე მეტი ჩვენი თანამოქალაქე ცხოვრობდა სიღარიბის ზღვარს მიღმა. 2023 წლის მონაცემები გამოაქვეყნა საქსტატმა და სიღარიბე არის შემცირებულ 11,8%-მდე, რაც ნიშნავს იმას, რომ დღეს სიღარიბის ზღვარს მიღმა ცხოვრობს საქართველოში 435 000 ადამიანი. ესეც ჩვენთვის არის, რა თქმა უნდა, ძალიან სამწუხარო და შემაშფოთებელი მაჩვენებელი.
ჩვენი ერთ-ერთი უმთავრესი ეროვნული ამოცანაა, როგორც უკვე ვთქვი, სიღარიბის საბოლოოდ აღმოფხვრა, მაგრამ ასევე მინდა კიდევ ერთხელ შეგახსენოთ, რომ 1,1 მლნ ადამიანიდან სიღარიბის მაჩვენებელი შემცირდა 435 000 ადამიანამდე ჩვენი ხელისუფლების პირობებში", - განაცხადა პრემიერმა.
კობახიძის თქმით, "ქართული ოცნების" ხელისუფლების პირობებში სიღარიბე 700 000-მდე ადამიანმა დაძლია.
წელსაც გვაქვს მაღალი ეკონომიკური ზრდა, აქედან გამომდინარე, წელსაც ათი ათასობით ადამიანი დაძლევს სიღარიბეს და მაღალი ალბათობით 2024 წელს უკვე ერთნიშნა მაჩვენებელი დაფიქსირდება სიღარიბის კუთხით. მთლიანობაში შეგახსენებთ, რომ 700 000-მდე მოქალაქემ დაძლია სიღარიბე 2012 წლიდან დღემდე, რაც არის მნიშვნელოვანი მიღწევა, თუმცა ჩვენი საბოლოო ეროვნული ამოცანაა სიღარიბის საბოლოოდ განულება“, - განაცხადა პრემიერმა.
