BMW-მ დაადასტურა, რომ ბრენდის პირველი სრულად ელექტრო სპორტული სედანი M3-ის სახელით გამოვა. გავრცელებული ვარაუდის მიუხედავად, ავტომობილს iM3 არ დაერქმევა. კომპანიის გადაწყვეტილებით, ახალი მოდელი M3-ის ოჯახის სრულფასოვანი წევრი იქნება და არა ცალკე შექმნილი ელექტრომობილი.
ინფორმაცია Goodwood Festival of Speed-ზე BMW M-ის ხელმძღვანელმა ფრანკ ვან მილმა გააჟღერა. მისი თქმით, ისტორიული სახელის შენარჩუნებით კომპანია ხაზს უსვამს, რომ M3-ის იდენტობას მხოლოდ ძრავის ტიპი არ განსაზღვრავს. მთავარი ავტომობილის მართვის ხასიათი, შესაძლებლობები და M-სერიისთვის დამახასიათებელი დინამიკაა.
ელექტრო M3 ბაზარზე შიგაწვის ძრავის მქონე ახალი თაობის M3-თან ერთად გაიყიდება. შესაბამისად, მომხმარებელს საშუალება ექნება, ტრადიციულ და სრულად ელექტრულ ვერსიებს შორის თავად გააკეთოს არჩევანი.
მოსალოდნელია, რომ ელექტრო M3 მოდელის ყველაზე მძლავრი ვერსია გახდება. BMW-ის ახალი ოთხძრავიანი სისტემა თეორიულად 1 341 ცხენის ძალამდე სიმძლავრეს იძლევა, თუმცა სერიულ ავტომობილში ეს მაჩვენებელი, სავარაუდოდ, ნაკლები იქნება. დაუდასტურებელი ინფორმაციით, საბაზისო ელექტრო M3 დაახლოებით 700 ცხენის ძალას გამოიმუშავებს.
BMW-ში განმარტავენ, რომ მაღალი სიმძლავრე ახალი მოდელის მხოლოდ ერთი ნაწილია. M-სერიისთვის გადამწყვეტი მნიშვნელობა ექნება ზუსტ მართვას, ავტომობილის ბალანსსა და საჭესთან მიღებულ შეგრძნებებს.
მომავალი ელექტრო M3-ის დიზაინის მიმართულება კომპანიამ BMW M Concept Neue Klasse-ის სახით უკვე აჩვენა. კონცეფტი დაბალი პროფილით, გაფართოებული ფრთებით, კაპოტზე განთავსებული ჰაერის შემშვებებით, გაყოფილი უკანა სპოილერითა და დიდი დიფუზორით გამოირჩევა. სერიულ ვერსიაში ზოგიერთი დეტალი, სავარაუდოდ, გამარტივდება.
