დღის TOP 10 მნიშვნელოვანი ამბავი
1. ბოლო 1 თვეში ვადაგადაცილებული სესხების მოცულობა 100 მლნ ლარით შემცირდა
ვადაგადაცილებული სესხების მოცულობა ივნისში, წინა თვესთან შედარებით, 100 მლნ–ით 510 მლნ ლარამდე შემცირდა. გასული წლის ანალოგიურ პერიოდთან შედარებით კი 11 მლნ-ით გაიზარდა. ამის შესახებ ინფორმაციას ეროვნული ბანკი ავრცელებს.
2.რეგიონის ქვეყნებს შორის ერთ-ერთი ყველაზე მაღალი ინფლაცია საქართველოშია
ინფლაციის მიხედვით, საქართველო რეგიონში მეორე ადგილზეა. წლიური ინფლაციის მაღალი დონით ქვეყნების სამეულს თუ ავიღებთ, პირველ ადგილზე თურქეთია 18,95%-ით, მეორეზე საქართველო 11,92%-ით და შემდეგ უკრაინა, სადაც ინფლაცია 9.5%-ს შეადგენს.
3.ბიბლიოთეკა გემზე - უნიკალური პროექტი მხარდამჭერების მოლოდინშია
განმუხურში, სანაპიროზე გამორიყულ ძველ გემში, უნიკალური ბიბლიოთეკის მოწყობა იგეგმება. ინიციატივა პირველად ზუგდიდის მუნიციპალიტეტის მერიის „ბიბლიოთეკების მართვის ცენტრის“ დირექტორმა ბესიკ არახამიამ სოციალური ქსელის საშუალებით გააჟღერა, რასაც დიდი გამოხმაურება მოჰყვა. თუმცა სიტყვიერ მხარადჭერასთან ერთად, პროექტის განხორციელება გარკვეულ ფინანსურ რესურსსაც მოითხოვს.
4. „თბილსერვისის“ თანამშრომლები გაიფიცნენ
თბილსერვისის თანამშრომლები სამუშაო პირობების გაუმჯობესების მოთხოვნით კომპანიის შენობასთან აქციას მართავენ. კომპანია თბილისის მერიის დაქვემდებარებაშია და დედაქალაქის დასუფთავება ეველაება.
5. 900%–ით გაძვირებული ნედლეული და პანდემიის სხვა გამოწვევები „გრინპაკში“
შესაფუთი მასალების მწარმოებელი კომპანია „გრინპაკის“ დამფუძნებელი პაატა აბრამია ბოლო წლებში ბიზნესში არსებულ სირთულეებზე საუბრობს. მიუხედავად იმისა, რომ კომპანიას პანდემიურ პერიოდში საქმიანობა არ შეუჩერებია, როგორც ბიზნესმენი ამბობს, სერიოზულ ზარალს განიცდის სავალუტო რყევებისა და ინფლაციური პროცესების გამო. აბრამიას ინფორმაციით, თითქმის 900%-ით გაძვირდა ნედლეულის იმპორტი, რის გამოც კომპანია ბაზრის დივერსიფიცირებას გეგმავს.
6. „აუთლეტ სოფელი“ და „ლილო მოლი“ ერთმანეთის კონკურენტები ვერ იქნებიან
„აუთლეტ სოფელი“ , რომელიც გეზ–ის მოპირდაპირე მხარეს, რუსთავის გზაზე იხსნება, ჩვენი კონკურენტი არ იქნება“, - ეს განცხადება „კომერსანტთან“ საუბრისას „ლილო მოლის“ დირექტორმა გიორგი კვარაცხელიამ გააკეთა და დასძინა, რომ მიესალმება ქვეყანაში ახალი ბიზნეობიექტების გახსნას.
7. გენო პეტრიაშვილმა ტოკიოს ოლიმპიადაზე ვერცხლის მედალი მოიპოვა
ქართველმა მოჭიდავე გენო პეტრიაშვილმა ტოკიოს ოლიმპიადის ფინალი ამერიკელ სტივენსონთან ბოლო წამზე დათმო და ვერცხლის მედალი მოიგო.
8. ქართული ატმისა და ვაშლის ექსპორტი რეკორდულ ნიშნულზეა
საქართველოდან მიმდინარე წელს ექსპორტზე რეკორდული მოცულობის ვაშლი და ატამი გადის. 5 აგვისტოს მდგომარეობით ექსპორტირებული პროდუქციის მოცულობამ 24 000 ტ შეადგინა. ამის შესახებ სოფლის მეურნეობის მინისტრმა ლევან დავითაშვილმა გურჯაანში ადგილობრივ ფერმერებთან შეხვედრაზე თქვა.
9. „ლილო მოლში“ აცრის ცენტრი გაიხსნა
„ლილო მოლის“ ადმინისტრაციამ სავაჭრო ობიექტის ტერიტორიაზე საკუთარი სახსრებით მოაწყო და აღჭურვა კლინიკა, რომელიც ჯანდაცვის სამინისტროს გადასცეს კორონავირუსის საწინააღმდეგო ვაქცინაციის საწარმოებლად. ამის შესახებ „კომერსანტს“ „ლილო მოლის“ დირექტორმა გიორგი კვარაცხელიამ უთხრა.
10. გაგრძელდება თუ არა IT-გიგანტების კაპიტალიზაციის ზრდა?
2021 წლის მე-2 კვარტალი, ფინანსური შედეგების კუთხით, IT-გიგანტებისთვის - Facebook, Apple, Amazon, Microsoft და Alphabet-ისთვის რეკორდული აღმოჩნდა - მათი ჯამური კაპიტალიზაცია $10 ტრლნ-ს მიუახლოვდა.