შესაფუთი მასალების მწარმოებელი კომპანია „გრინპაკის“ დამფუძნებელი პაატა აბრამია ბოლო წლებში ბიზნესში არსებულ სირთულეებზე საუბრობს. მიუხედავად იმისა, რომ კომპანიას პანდემიურ პერიოდში საქმიანობა არ შეუჩერებია, როგორც ბიზნესმენი ამბობს, სერიოზულ ზარალს განიცდის სავალუტო რყევებისა და ინფლაციური პროცესების გამო. აბრამიას ინფორმაციით, თითქმის 900%-ით გაძვირდა ნედლეულის იმპორტი, რის გამოც კომპანია ბაზრის დივერსიფიცირებას გეგმავს.  

„საწარმოო პროცესი არ გაგვიჩერებია, ვმუშაობდით ლოქდაუნის პერიოდშიც და ახლაც ჩვეულებრივ ვაგრძელებთ საქმიანობას. ვმუშაობთ რეგულაციების დაცვით, რაც კანონმდებლობით მოგვეთხოვება. პანდემიაზე მეტად სავალუტო რყევები და ინფლაცია გვაფერხებს. სანამ ლარის კურსი არ დასტაბილურდება ისე, რომ შეღავათი ბიზნესმა იგრძნოს, პრობლემა სულ იარსებებს. კომპანიაში 35 დასაქმებული გვყავს, ვაპირებდით თანამშრომლების რაოდენობის ზრდას, მაგრამ არსებულ სიტუაციაში ახალი კადრების დამატება სერიოზულ გამოწვევად რჩება. ნედლეულის მხრივ არის პრობლემა, თუმცა დიდი მოთხოვნით არც შიდა ბაზარი გამოირჩევა. ვმუშაობთ ექსპორტის მიმართულებითაც, პროდუქცია ამ ეტაპზე სომხეთში გაგვაქვს. რაც შეეხება იმპორტს, ჩინეთი გვამარაგებს, თუმცა ვფიქრობთ ბაზრის დივერსიფიცირებაზეც. მარტო იმპორტის ხარჯი, ტრანსპორტირების ჩათვლით, 900%-მდე გაიზარდა. თუკი პანდემიამდე 1 კონტეინერი ნედლეულის ჩამოტანა $2500 გვიჯდებოდა, დღეს $14 000 ღირს. ამიტომ სხვა მომწოდებლების ძიებაში ვართ, ხარჯს უკვე რთულად ვუმკლავდებით“, - ამბობს პაატა არახამია „კომერსანტთან“.

ჯერ კიდევ პანდემიამდე „გრინპაკი“ ახალი ქარხნის აშენებას გეგმავდა, რისთვისაც დავით აღმაშენებლის ხეივნის მე-13 კილომეტრზე არსებული 2587კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები საერთო ფართით 385,09 კვ.მ. ერთ ლარად საკუთრებაში გადაეცა. კომპანია წარმოების სრულად ამოქმედებას 2019 წლიდან გეგმავდა. თუმცა, როგორც პაატა აბრამია ამბობს, პანდემიამ და მასთან დაკავშირებულმა პროცესმა გეგმა შეცვალა და პროექტის განხორციელების ვადაც შეიცვალა. ბიზნესმენის თქმით, ახალი ქარხნის მშენებლობა უახლოეს მომავალში არ იგეგმება.

2014 წელს დაფუძნებული შპს „გრინპაკი“ ქაღალდისა და მუყაოს პროდუქციის წარმოებაზე ორიენტირებული კომპანიაა (ქაღალდის პარკები, ჭიქები, თეფშები, სხვადასხვა სახეობის მუყაოს ყუთები და შესაფუთი საშუალებები), რომლის საქმიანობის ძირითად მიმართულებას ასევე უქსოვადი ქსოვილის (ტომრები, პაკეტები, დეკორატიული და სხვა ნაწარმი) წარმოებაც წარმოადგენს.

სახელმწიფო პროგრამის ,,აწარმოე საქართველოს“ ფარგლებში განხორციელებული პროექტის ჯამური ინვესტიციის მოცულობა $5 მლნ–ს შეადგენს.

კომპანიამ მეწარმეობის განვითარების სააგენტოსთან თანამშრომლობა 2017 წლის დეკემბერში დაასრულა და ბაზარზე ოპერირებას დამოუკიდებლად აგრძელებს.

მარი ჩიტაია