უნგრულმა ავიაკომპანია Wizz Air-მა განაცხადა, რომ არსებული ვითარების გამო, ისრაელის მიმართულებით რეისები, შემდგომ შეტყობინებამდე, გაუქმდა. ამის შესახებ ინფორმაციას Reuters ავრცელებს.
„ჩვენ ვაგრძელებთ სიტუაციის მჭიდრო მონიტორინგს და ვუკავშირდებით შესაბამის ორგანოებს“, - აღნიშნა კომპანიის სპიკერმა დღეს გავრცელებულ განცხადებაში.
ავიაკომპანიის მხრიდან დამატებითი განმარტებები ჯერჯერობით არ გაკეთებულა.
მოგზაურებს, რომლებმაც უკვე დაჯავშნეს ბილეთები ისრაელისკენ, ურჩევენ დაუკავშირდნენ ავიაკომპანიას დამატებითი ინფორმაციისა და დახმარებისთვის.
7 ოქტომბერს ღაზას სექტორიდან სამხრეთ და ცენტრალურ ისრაელზე სარაკეტო თავდასხმები განხორციელდა. ათობით პალესტინელი მებრძოლი ისრაელის ტერიტორიაზე სატვირთო მანქანებითა და პარაპლანით შევიდა.
ბოლო მონაცემებით, ისრაელში სულ მცირე 700 ადამიანი დაიღუპა, დაახლოებით 2 000 დაშავდა, 130-ზე მეტი კი მძევლად აიყვანეს.
ისრაელის თავდაცვის ძალებმა ოპერაცია „რკინის ხმლები“ დაიწყო. ქვეყანაში ოფიციალურად გამოცხადდა საომარი მდგომარეობა.
