რუსეთიდან აშშ-ის მიმართულებით დაახლოებით 40 000 ტონა დიზელის საწვავის გადაზიდვა მიმდინარეობს. თუ ტანკერი დანიშნულების ადგილამდე მივა, ეს 2023 წლის ივლისის შემდეგ აშშ-ში რუსული დიზელის პირველი მსგავსი მიწოდება იქნება. Euronews-ის ინფორმაციით, გადაზიდვა ვაშინგტონსა და მოსკოვს შორის მიღწეულ შეთანხმებას უკავშირდება, რომლის ფარგლებშიც აშშ-მა რუსული დიზელის მიმართ სანქციები დროებით შეამსუბუქა.
საზღვაო გადაზიდვების მონიტორინგის კომპანია Kpler-ის მონაცემებით, მალტის დროშის ქვეშ მცურავმა ტანკერმა Agioi Fanendes-მა რუსეთის ბალტიის ზღვის პორტ პრიმორსკში დაახლოებით 40 000 ტონა, ანუ 300 000 ბარელი დიზელი დატვირთა. გემის დანიშნულების ადგილად ნიუ-იორკია მითითებული, ჩასვლის სავარაუდო თარიღად კი 7 ნოემბერი სახელდება. ტვირთის მოცულობას LSEG-ის საზღვაო გადაზიდვების მონაცემებიც ადასტურებს.
Kpler-ის ცნობით, კომპანიას აშშ-ში რუსული დიზელის მსგავსი გადაზიდვა ბოლოს 2023 წლის ივლისში ჰქონდა დაფიქსირებული. ამასთან, პრიმორსკიდან ნიუ-იორკში საწვავის ბოლო მსგავსი მიწოდება 2022 წლის იანვარში განხორციელდა. ამ დროისთვის უცნობია, ვინ არიან მიმდინარე ტვირთის გამყიდველი და მყიდველი.
რუსეთის ვიცე-პრემიერ ალექსანდრ ნოვაკის განცხადებით, აშშ-ისთვის განკუთვნილი რუსული დიზელის პირველი ტვირთი ხუთშაბათს უნდა გამგზავრებულიყო. რუსული საინფორმაციო სააგენტოების ცნობით, ნოვაკმა ასევე აღნიშნა, რომ დამატებითი გადაზიდვებიც იგეგმება, რადგან რუსული და ამერიკული კომპანიები საწვავის მიწოდების შესახებ კონტრაქტებზე მუშაობენ.
აშშ-ის პრეზიდენტმა დონალდ ტრამპმა ვაშინგტონსა და მოსკოვს შორის შეთანხმების შესახებ 9 ოქტომბერს განაცხადა. მისი თქმით, რუსეთი დიზელს როგორც აშშ-ს, ისე გლობალურ ბაზრებს მიაწვდის. სანქციების დროებით შემსუბუქებასთან ერთად, რუსეთმა დიზელის ექსპორტზე დაწესებული საკუთარი აკრძალვაც უნდა გააუქმოს.
ტრამპის მიერ დასახელებული გეგმის მიხედვით, რუსეთიდან თავდაპირველად 300 000 ტონა დიზელის მიწოდება იყო გათვალისწინებული. ნოემბერში ეს მოცულობა 500 000 ტონამდე, მოგვიანებით კი 1 მილიონ ტონამდე უნდა გაზრდილიყო.
შეთანხმების ერთ-ერთ მიზნად აშშ-ში საწვავის ფასების შემცირება დასახელდა, განსაკუთრებით შუალედური არჩევნების წინ. ინიციატივას კრიტიკა მოჰყვა უკრაინისა და მისი მოკავშირეების მხრიდან, მათ შორის ტრამპის რესპუბლიკური პარტიის ზოგიერთი წარმომადგენლისგან.
რუსული დიზელის საექსპორტო მიმართულებები მას შემდეგ შეიცვალა, რაც ევროკავშირმა 2023 წლის თებერვალში რუსულ ნავთობპროდუქტებზე ემბარგო აამოქმედა. ამის შემდეგ რუსეთისთვის დიზელის ძირითად საექსპორტო ბაზრებად ბრაზილია, თურქეთი და აფრიკის ქვეყნები იქცა.
