გერმანულმა ავიაკომპანიამ Lufthansa ინტერესი გამოთქვა TAP Air Portugal-ის წილის შეძენის თაობაზე, რითაც ის შეუერთდა Air France-KLM-ს იმ ბრძოლაში, რომელიც პორტუგალიური გადამზიდველის დაგეგმილი პრივატიზაციის ფონზე მიმდინარეობს. ამის შესახებ კომპანიამ ხუთშაბათს განაცხადა, იუწყება AFP.
TAP, რომელიც COVID-19-ის პანდემიის დროს ნაციონალიზებული იყო, ევროპაში დარჩენილ სახელმწიფო საკუთრებაში არსებულ მცირერიცხოვან გადამზიდველთაგანია. ის მსხვილი მოთამაშეებისთვის მიმზიდველია მისი მარშრუტების გამო, რომლებიც ბრაზილიისა და პორტუგალიურენოვანი აფრიკის მიმართულებებს მოიცავს.
Lufthansa, რომელიც უკვე ფლობს მრავალ ავიაკომპანიას და შემოსავლების მიხედვით ევროპის უმსხვილესი ავიაკომპანიების ჯგუფია, აცხადებს, რომ მან TAP-ის მფლობელი სახელმწიფო ჰოლდინგური კომპანიისთვის შეთავაზება წარადგინა.
„ჩვენი მიზანია გავაძლიეროთ პორტუგალიის გლობალური კავშირები, შევინარჩუნოთ TAP-ის პორტუგალიური იდენტურობა და უზრუნველვყოთ ავიაკომპანიის მდგრადი ზრდა,“ — ნათქვამია Lufthansa-ს აღმასრულებელმა დირექტორის, კარსტენ შპორისგანცხადებაში. „TAP Air Portugal დიდ სტრატეგიულ მნიშვნელობას ატარებს ევროპული ავიაციის ინდუსტრიისთვის… ჩვენი ფართო ინვესტიციებით პორტუგალიაში, ჩვენ ვაგრძელებთ Lufthansa Group-ის განხილვას, როგორც საუკეთესო პარტნიორის TAP-ისა და პორტუგალიისთვის.“
ლისაბონმა სექტემბერში განაცხადა, რომ ეძებდა მსხვილ საერთაშორისო ავიაკომპანიას, რომელიც შეიძენდა გადამზიდველის 49.9 პროცენტიანი წილის უმეტეს ნაწილს, რომლის პრივატიზაციაც იგეგმება. Lufthansa-ს განცხადებით, „უმცირესობის წილის“ შეძენის შემდეგ, მისი მიზანია პორტუგალიის ეროვნულ ავიაკომპანიასთან „გრძელვადიანი პარტნიორობის“დამყარება.
Air France-KLM-მა ოთხშაბათს განაცხადა, რომ მან ასევე ოფიციალურად გამოხატა ინტერესი TAP-ის წილის მოსაპოვებლად.
გავრცელებული ინფორმაციით, წილის მოპოვებით დაინტერესებულია ასევე IAG Group(რომელშიც შედის British Airways და Iberia). ეს სამი ჯგუფი ბოლო წლებში ევროპის საავიაციო სექტორში დომინანტ მოთამაშეებად იქცნენ.
პორტუგალიის მთავრობისთვის ნებისმიერ გარიგებაში პრიორიტეტად რჩება პორტუგალიურენოვან რეგიონებთან მარშრუტების შენარჩუნება. ოთხშაბათს პორტუგალიურმა გადამზიდველმა განაცხადა, რომ ივლისი-სექტემბრის პერიოდში ის დაუბრუნდა მოგებიანობას და ჯანსაღი ფინანსური შედეგი დააფიქსირა.
