ევროკავშირის უმაღლესი წარმომადგენელი კაია კალასი იმედოვნებს, რომ ევროკავშირი თავიდან აიცილებს აშშ-თან ტარიფების გამო სავაჭრო დაპირისპირებას. ამის შესახებ კალასმა ევროკავშირის წევრი ქვეყნების საგარეო საქმეთა მინისტრების შეხვედრის დაწყებამდე, ჟურნალისტებთან საუბრისას განაცხადა.
კალასმა აღნიშნა, რომ ევროკავშირი და აშშ მოკავშირეები არიან.
„სავაჭრო ომებში გამარჯვებულები არ არიან. ეს ტარიფები არ არის დადებითი გადაწყვეტილება. ისეთი მოკავშირეები, როგორიც ვართ ჩვენ და აშშ, თუ იწყებენ სავაჭრო ომს, მტრები ამას აკვირდებიან“, – აღნიშნა კალასმა.
მისივე თქმით, იმედოვნებს, რომ შესაძლებელი იქნება დაპირისპირების გაღრმავების თავიდან აცილება.
„ახლა ჩვენ სავაჭრო მოლაპარაკებების იმედი გვაქვს, რაც საშუალებას მოგვცემს, ვიპოვოთ დადებითი გამოსავალი ამ სიტუაციიდან, მაგრამ ასევე მზად ვართ, დავიცვათ ჩვენი ინტერესები“, – განაცხადა კალასმა.
