ცეტინიეში განხორციელებული თავდასხმის შემდეგ, მონტენეგროს ხელისუფლება იარაღზე კონტროლის გამკაცრებას გეგმავს. ამის შესახებ მონტენეგროს პრემიერ-მინისტრმა, მილოიკო სპაიჩმა ეროვნული უსაფრთხოების საბჭოს სხდომის შემდეგ განაცხადა.
სპაიჩის თქმით, ის პირები, რომლებსაც ცეცხლსასროლი იარაღის ფლობაზე მოქმედი ლიცენზია გააჩნიათ, ვალდებული იქნებიან 2026 წლამდე დამატებითი ფსიქოლოგიური შემოწმება გაიარონ, წინააღმდეგ შემთხვევაში მათი ლიცენზია გაუქმდება. იმ პირებს კი, ვისაც იარაღი ნებართვის გარეშე აქვთ, მის ჩასაბარებლად ორთვიანი ვადა მისცეს, წინააღმდეგ შემთხვევაში, პრემიერის თქმით, მათ „დრაკონული სასჯელი“ ელით.
„ჩვენ დავასკვენით, რომ მივიღებთ ახალ კანონს იარაღის შესახებ, ვსაუბრობ ლეგალურ იარაღზე და არა უკანონო იარაღზე. იმ ადამიანებს, რომლებსაც ახლა აქვთ ნებართვები, 2026 წლის პირველ იანვრამდე ექნებათ ვადა, რომ გაიარონ ახალი შემოწმება. რაც გულისხმობს უსაფრთხოების შემოწმებას, კერძოდ, ფსიქოლოგიურ და ჯანმრთელობასთან დაკავშირებულ სხვა შემოწმებებს. პროცედურა იქნება ბევრად უფრო მკაცრი, ვიდრე ამჟამად მოქმედია. ასე რომ, ახალი კანონის მიხედვით, 2026 წლის პირველ იანვრამდე ახალი შემოწმების გავლის მოთხოვნის შეუსრულებლობის შემთხვევაში, ეს ლიცენზია გაუქმდება და, შესაბამისად, იარაღი აღარ იქნება ლეგალური. ჯანმრთელობის პრობლემის გარდა, მეორე პრობლემაა იარაღის ხელმისაწვდომობა და მესამე – პოლიციის თანამშრომელთა რაოდენობა. მოგეხსენებათ, წინა ორი წლის განმავლობაში პოლიციის ათასზე მეტი თანამშრომელი გავიდა პენსიაზე“, – განაცხადა სპაიჩმა.
ეროვნული უსაფრთხოების საბჭოს სხდომის პარალელურად, პოდგორიცაში ასობით ადამიანი შეიწირება დემონსტრაციაში მონაწილეობისთვის. მათ სროლის დროს ხელისუფლება არასათანადო რეაგირებაში დაადანაშაულეს და შინაგან საქმეთა მინისტრისა და პოლიციის უფროსის გადადგომა მოითხოვეს.
მანამდე პოლიციის უფროსმა, ლაზარ სცეპანოვიჩმა განაცხადა, რომ პოლიციის რეაგირება დაგვიანდა შეცდომაში შემყვანი ინფორმაციის გამო, რომლის შედეგადაც პირველი ეკიპაჟი არასწორ ადგილას მივიდა. პრემიერ-მინისტრის განცხადებით, შინაგან საქმეთა სამინისტროს დაევალება სწრაფი რეაგირების მობილური ჯგუფის შექმნა მსგავს საგანგებო სიტუაციებზე პასუხისთვის.
ცნობისთვის, პირველ იანვარს ქალაქ ცეტინიეში 45 წლის მამაკაცმა ჯერ – ერთ-ერთ ბარში, შემდეგ კი ქუჩაში ცეცხლი გახსნა და 12 ადამიანი მოკლა. მძიმედ დაჭრა ოთხი პირი.
წყარო: 1 არხი
