უკრაინის პრეზიდენტმა ვოლოდიმირ ზელენსკიმ უმაღლეს რადას წარუდგინა კანონპროექტი „უკრაინაში ინგლისური ენის გამოყენების შესახებ“, რომელიც ოფიციალურად უნდა გააძლიეროს ინგლისური, როგორც საერთაშორისო კომუნიკაციის ერთ-ერთი ენა უკრაინაში.
დოკუმენტი განსაზღვრავს თანამდებობებს, რომლისთვისაც კანდიდატებს ინგლისური ენის ცოდნა მოეთხოვებათ. პროექტი ახდენს ინგლისური ენის გამოყენების თავისებურებების ნორმალიზებას სახელმწიფო და ადგილობრივი ხელისუფლების, ადგილობრივი თვითმმართველობებისა და მოსახლეობის გადაუდებელი დახმარების განყოფილებების მუშაობაში, ასევე - სახელმწიფო საზღვრის გადაკვეთისას, განათლების, კულტურის, ტრანსპორტის, ჯანდაცვის სფეროებში და ა.შ.
როგორც პროექტის განმარტებით ჩანაწერშია აღნიშნული, ინგლისური დე იურე ოფიციალური ენაა მსოფლიოს 196 ქვეყნიდან 58-ში და დე ფაქტო - სხვა ქვეყნებსა და ტერიტორიებზე (ბანგლადეში, კვიპროსი, ისრაელი, იორდანია, მალაიზია, მალდივები. შრი-ლანკა, UAE). ეს არის გაეროს 6 ენიდან ერთ-ერთი და ასევე არის ევროკავშირის, ევროპის საბჭოს, ევროკომისიის, ევროპის თავისუფალი ვაჭრობის ასოციაციის და NATO-ს ოფიციალური ენა.
ახლა უკრაინას აქვს ევროკავშირის წევრობის კანდიდატის სტატუსი, მაგრამ მაინც რჩება ევროკავშირისგან გამოყოფილი ენობრივი ბარიერით. ევროპის სხვა ქვეყნებთან შედარებით, უკრაინა ჩამორჩება მოქალაქეების მზაობაში უცხო ენაზე, მათ შორის ინგლისურად, კომუნიკაციისთვის. ინგლისური ენის ცოდნის ინდექსის 2021 წლის მონაცემების მიხედვით, მსოფლიოს სხვადასხვა ქვეყანაში ინგლისური ენის ცოდნის დონის დასადგენად, უკრაინა ინგლისური ენის ცოდნის საშუალო დონის მქონე ქვეყნებს შორისაა და 112 ქვეყნის რეიტინგში მე-40 ადგილს იკავებს.
„უკრაინაში ინგლისური ენის სტატუსის ტრანსფორმაცია სტრატეგიული ნაბიჯია ჩვენი სახელმწიფოს ევროკავშირში სრულუფლებიანი წევრობისკენ, რადგან ინგლისური ენის ცოდნა საკვანძო კომპეტენციაა გლობალიზაციის ცვლილებების კონტექსტში,“ - ნათქვამია დოკუმენტში.
კანონპროექტის მიხედვით, თანამდებობაზე მსურველთათვის დადგენილია გარკვეული კატეგორიები:
საჯარო სამსახურში - კატეგორია „A“;
საჯარო სამსახურის კატეგორიები - „B“ და „C“;
ინგლისური ენის ცოდნა მოეთხოვებათ: ადგილობრივი სახელმწიფო ადმინისტრაციის თავმჯდომარეებს, მათ პირველ მოადგილეებსა და მოადგილეებს; ოფიცერთა კორპუსის სამხედრო მოსამსახურეებს, რომლებიც სამხედრო სამსახურს ხელშეკრულებით გადიან; უკრაინის ეროვნული პოლიციის საშუალო და უფროს პოლიციის თანამშრომლებს; პროკურორებს; საგადასახადო და საბაჟო ორგანოებში დასაქმებულებს და ეკონომიკის საჯარო სექტორის სუბიექტების ხელმძღვანელებს.
სოციოლოგიური ჯგუფ „რეიტინგის“ გამოკითხვის თანახმად, ომის დაწყების შემდეგ უკრაინელებში რუსული ენის ყოველდღიურ ცხოვრებაში გამოყენება დაახლოებით ნახევრით - 13%-მდე შემცირდა.
