ილონ მასკის სოციალური მედიის კომპანია X-მა უზენაეს სასამართლოს მიმართა, რათა საკუთარი მომხმარებლები აშშ-ს სამართალდამცავი ორგანოებისგან დაიცვას. გამოცემა Financial Times წერს, რომ კომპანიის მიერ საქმეში ჩარევას, შესაძლოა, ფედერალური მთავრობის მხრიდან ორდერის გაცემა მოჰყვეს, რათა შესაბამისმა ორგანოებმა პირად მონაცემებზე წვდომა მოიპოვონ.
უზენაესი სასამართლოსთვის წარდგენილი ბრიფის მიხედვით, კომპანია X შეშფოთებას გამოხატავს "ფართო, დაუსაბუთებელ" მოთხოვნებთან დაკავშირებით და ამატებს, რომ პლატფორმებს "არ უნდა აიძულონ, დაეხმარონ მთავრობებს მომხმარებლების კონფიდენციალურობის ძირის გამოთხრაში".
საქმე ეხება დიდი ხნის წინ დაწყებულ საქმეს, რომელიც კრიპტო ბირჟა Coinbase-ის მომხმარებელმა, ჯეიმზ ჰარპერმა აღძრა. ის ამტკიცებს, რომ იგი ერთ-ერთია იმ 1000-მდე Coinbase-ის მომხმარებლებს შორის, რომელთა სავაჭრო საქმიანობის შესახებ მონაცემები აშშ-ს შიდა შემოსავლების სამსახურს (IRS) გადაეცა. მისი თქმით, ყოველივე ეს სააგენტოს მხრიდან პოტენციური საგადასახადო თაღლითობის გამოვლენის მიზნით მოხდა, რაც X-ის კონფიდენციალურობის პოლიტიკის დარღვევით მოხდა.
საქმეში, რომელიც ჯერჯერობით უზენაეს სასამართლოს არ განუხილავს, მოსარჩელე მხარის მოთხოვნების დაკმაყოფილების შემთხვევაში აშშ-ს მთავრობა ვეღარ შეძლებს, მომხმარებლების მონაცემებისო გადაცემა აიძულოს X-ს, თუკი "გონივრული საფუძველი და განსაზღვრული ეჭვი" არ არსებობს.
საქმეში კომპანია X-მა უზენაეს სასამართლოს ბრიფი იმ ფონზე წარუდგინა, როცა ბოლო პერიოდში მასკი მზარდად უპირისპირდება მსოფლიოში, მისი თქმით, მთავრობების მხრიდან სოციალური მედიის მომხმარებლების ცენზურის მცდელობებს.
2022 წელს X-ის $44 მილიარდად შესყიდვის შემდეგ, მასკი, რომელიც თვითგამოცხადებული სიტყვის თავისუფლების აბსოლუტისტია, ხშირად უპირისპირდებოდა ბრაზილიიდან, ინდოეთიდან, თუ ავსტრალიიდან კონტენტის "აღების" მოთხოვნებს და ზოგიერთ შემთხვევაში მსგავსი ქვეყნების მთავრობებთან და სასამართლო შტოსთანაც მოდიოდა წინააღმდეგობაში.
მანამდე, 23 მარტს, მასკის X-მა უარი თქვა თურქეთის სასამართლოს რამდენიმე განკარგულების დაკმაყოფილებაზე, რომელიც თურქული ახალი ამბების ორგანიზაციების, ჟურნალისტების, პოლიტიკური ფიგურებისა და სტუდენტების 700-ზე მეტი ანგარიშის დაბლოკვას ითხოვდა.
"ჩვენ ვეწინააღმდეგებით მრავალ სასამართლო განკარგულებას თურქეთის ინფორმაციისა და საკომუნიკაციო ტექნოლოგიების სააგენტოსგან თურქეთის შიგნით 700-ზე მეტი ანგარიშის დაბლოკვის შესახებ, რომლებიც ახალი ამბების ორგანიზაციებს, ჟურნალისტებს, პოლიტიკურ ფიგურებს, სტუდენტებსა და სხვებს ეკუთვნით". - წერდა X-ის გლობალური მთავრობების საქმეთა ანგარიში.
კომპანიის მიხედვით, X-ზე პირველხარისხოვანია, რომ მომხმარებლებს ისეთი პლატფორმა მიაწოდონ, რომელიც ყველა ადამიანის სიტყვის თავისუფლების დაცვის მიმართ არის ერთგული.
"ჩვენ გვჯერა, რომ ეს გადაწყვეტილება თურქეთის მთავრობის მხრიდან, არა მხოლოდ არაკანონიერია, არამედ ხელს უშლის მილიონობით თურქ მომხმარებელს, მიიღონ ახალი ამბები და ჩაერთონ ქვეყნის პოლიტიკურ დისკურსში. ჩვენ ვაპირებთ ამ პრინციპების დაცვას სამართლებრივი სისტემის მეშვეობით". - განაცხადა X-მა.
