ევროკავშირი სერბეთს მასშტაბურ ტყის ხანძრებთან საბრძოლველად ოთხ სახანძრო ვერტმფრენს, მეხანძრეებსა და სპეციალურ ტექნიკას უგზავნის. დახმარება ევროკავშირის სამოქალაქო დაცვის მექანიზმის ფარგლებში, სერბეთის მოთხოვნის საფუძველზე გააქტიურდა.
სერბეთის შინაგან საქმეთა სამინისტროს ინფორმაციით, დახმარება მოიცავს ოთხ rescEU Black Hawk-ის ტიპის ვერტმფრენს. ორი მათგანი ჩეხეთიდან, ერთი სლოვაკეთიდან, ხოლო ერთი რუმინეთიდან არის მობილიზებული. ვერტმფრენების წყალტევადობა 2.6-დან 3.5 ტონამდე მერყეობს.
რუმინეთმა სერბეთში 69 მეხანძრე და მაშველი, ასევე 15 ავტომობილი გაგზავნა. გერმანიის დახმარება 56 მეხანძრესა და 24 ავტომობილს მოიცავს. გერმანული ჯგუფის ჩასვლა 24 აგვისტოს არის დაგეგმილი.
დახმარება პირველ რიგში დელიბლატოს ქვიშების ბუნებრივ ტერიტორიაზე მიმდინარე ხანძრის ჩაქრობას მოხმარდება. Reuters-ის ცნობით, ცეცხლი ამ ტერიტორიაზე ივლისის ბოლოდან ვრცელდება და უკვე ათასობით ჰექტარი ფიჭვნარი დააზიანა. ხანძრები სერბეთის სამხრეთ დასავლეთ ნაწილშიც ფიქსირდება.
ოპერაციის კონკრეტული ღირებულება საჯაროდ არ გამოქვეყნებულა. თუმცა დაფინანსების მექანიზმი ცნობილია. ოთხივე ვერტმფრენი rescEU-ს სტრატეგიული რეზერვიდან არის მობილიზებული. ევროკომისიის ინფორმაციით, rescEU-ს შესაძლებლობების შეძენის, ოპერირებისა და ტექნიკური მომსახურების ხარჯები სრულად ევროკავშირის ბიუჯეტიდან ფინანსდება.
მეხანძრეებისა და ტექნიკის საერთაშორისო გადაადგილება ევროკავშირის სამოქალაქო დაცვის მექანიზმის ფარგლებში ხორციელდება. ევროკომისია ასეთი მისიების ტრანსპორტირებისა და საოპერაციო ხარჯების დაფინანსებაში ან თანადაფინანსებაში მონაწილეობს.
სერბეთი ევროკავშირის წევრი არ არის, თუმცა ის ევროკავშირის სამოქალაქო დაცვის მექანიზმის 10 მონაწილე არაწევრ ქვეყანას შორისაა და მექანიზმით როგორც დახმარების მისაღებად, ისე სხვა ქვეყნების დასახმარებლად სარგებლობს.
წყარო:
https://www.srbija.gov.rs/vest/en/285298/eu-assistance-in-fighting-fires-in-serbia.php
https://civil-protection-humanitarian-aid.ec.europa.eu/what/civil-protection/resceu_en
