ავსტრიის ქალაქ კარინტიაში ძროხამ, საკუთარი თავის მოსავლელად არსებული ნივთების მიზანმიმართულად გამოყენების უნარი აჩვენა. ამან ცხოველთა ქცევის სპეციალისტები აიძულა, ხელახლა შეეფასებინათ შინაური ცხოველების კოგნიტიური შესაძლებლობები, წერს The Guardian.
ცხოველის პატრონმა, ფერმერმა ვიტგარ ვიგელემ, შენიშნა თავისი შინაური ცხოველის, ვერონიკას, უჩვეულო ქმედებები. მან შენიშნა, რომ ძროხა ხანდახან ჩხირებს იღებდა და სხეულის ძნელად მისადგომ ადგილებში მოსაფხანად იყენებდა.
ვიგელემ აღნიშნა, რომ ცხოველი ოჯახის წევრების ხმებს იცნობს და ძახილზე რეაგირებს. ამ უნარების ვიდეოჩანაწერები ვენის ვეტერინარული მედიცინის უნივერსიტეტის ბიოლოგებთან მოხვდა. მეცნიერები ქალაქ Nötsch im Gailtal–ს ეწვივნენ, რათა ამ უნიკალური ქცევის უშუალოდ დაკვირვება მოეხდინათ.
დოქტორმა ანტონიო ოსუნია მასკარომ ტერიტორია აღწერა, როგორც იდილიური ადგილი მთებით, ტყეებითა და ტბებით. ექსპერიმენტების სერიის დროს, მკვლევრებმა ვერონიკას ჩვეულებრივი იატაკის ცოცხი შესთავაზეს. ყავისფერმა შვეიცარიულმა ძროხამ არა მხოლოდ აიღო ინსტრუმენტი, არამედ ჭკვიანურადაც გამოიყენა. მან ჯაგრისიანი მხარე აირჩია ზურგზე მაგარი კანის მოსაფხანად და უფრო მგრძნობიარე ადგილებისთვის, როგორიცაა ცური და მუცელი, გლუვ სახელურზე გადაერთო. თუ ცოცხი უხერხულად იქნებოდა განთავსებული, ცხოველი ენით ამოძრავებდა მას და შემდეგ კბილებით ასწევდა.
შვიდი დაკვირვების სესიის განმავლობაში მეცნიერებმა ინსტრუმენტის გამოყენების 76 შემთხვევა დააფიქსირეს. ფუნჯის ორივე ბოლოს სხვადასხვა მიზნით გამოყენების უნარი მრავალფუნქციურ ხელსაწყოდ ითვლება, რაც აქამდე მხოლოდ შიმპანზეებმა და ადამიანებმა აჩვენეს.
