საუდის არაბეთში, აშშ-სა და რუსეთის დელეგაციების შეხვედრა დასრულდა.
“რია ნოვოსტის“ ცნობით, საუდის არაბეთის დედაქალაქ ერ-რიადში ამერიკულ და რუსულ მხარეებს შორის მოლაპარაკებები 12 საათზე მეტ ხანს გაგრძელდა.
გამოცემა წერს, რომ მხარეები შეხვედრის შედეგების შესახებ ერთობლივ განცხადებას 25 მარტს გამოაქვეყნებენ.
მოლაპარაკებების შესახებ პოზიცია დააფიქსირა თეთრმა სახლმაც.
როგორც Reuters-ს წერს, თეთრი სახლის წარმომადგენელმა მათ განუცხადა რომ მხარეებს შორის პროგრესი მიღწეულია და "უახლოეს მომავალში მოსალოდნელია პოზიტიური განცხადებები“.
themoscowtimes -ის ინფორმაციით, საუდის არაბეთში გამართულ მოლაპარაკებებზე რუსეთის დელეგაცია ცდილობდა აშშ-სთან განეხილა უკრაინის ოთხი რეგიონის - დონეცკის, ლუგანსკის, ზაპოროჟიესა და ხერსონის ტერიტორიების საკითხი. ოფიციალური მოსკოვის პოზიციის მიხედვით, ეს მათი მიწებია.
"არ არსებობს რეგიონების ჩვენგან გამიჯვნის კონსტიტუციური მექანიზმი. ჩვენ გვჭირდება მთლიანი ზაპოროჟიე და ხერსონი. ან ტრამპი მოახდენს გავლენას, რომ მათ ტერიტორიები დატოვონ - ან გვეტყვიან: "შედით ხანგრძლივ მოლაპარაკებებში და გამოიყენეთ სამხედრო ძალა კონტროლის დასამყარებლად. ეს ჩვენთვის ყველაზე ცუდი ვარიანტია“, - წერს გამოცემა რუსულ წყაროზე დაყრდნობით.
მისვე თქმით, ალტერნატივის სახით, რუსეთს შეუძლია უკრაინის სხვა რეგიონების, მაგალითად: დნეპროპეტროვსკის ან სუმის “ხელში ჩაგდება“, შემდეგ კი მათ ხერსონსა და ზაპოროჟიეში გაცვლას შესთავაზებს.
შეგახსენებთ, საუდის არაბეთში გამართულ შეხვედრაზე მოსკოვს რუსეთის ფედერაციის საბჭოს საერთაშორისო კომიტეტის ხელმძღვანელი, გრიგორი კარასინი და უსაფრთხოების ფედერალური სამსახურის დირექტორის მრჩეველი, სერგეი ბესედა, ხოლო ვაშინგტონს თეთრი სახლის ეროვნული უსაფრთხოების საბჭოს უფროსი დირექტორი, ენდრიუ პიკი და სახელმწიფო დეპარტამენტის მაღალჩინოსანი, მაიკლ ენტონი წარმოადგენდნენ.
მანამდე კრემლში განაცხადეს, შეხვედრის განხილვის ერთ-ერთი მთავარი თემა შავი ზღვის ინიციატივის, კერძოდ გემების უსაფრთხოების უზრუნველყოფის საკითხი იყო.
