სლოვაკეთის პრემიერ-მინისტრმა, რობერტ ფიცომ დონალდ ტრამპის ადმინისტრაციის „სამშვიდობო გეგმას“ მხარი დაუჭირა და აღნიშნა, რომ ეს შეთანხმება რუსეთისთვის ხელსაყრელია. ამის შესახებ ჩეხური გამოცემა Novinky-ი წერს.
ჟურნალისტებთან საუბრისას ფიცომ აშშ-ის „სამშვიდობო გეგმას“ „გრანდიოზული მასალა“ უწოდა და დაამატა, რომ „იმ უმნიშვნელო გავლენის ფარგლებში, რომელიც სლოვაკეთს აქვს ევროკავშირში, ამ შეთანხმებას მხარს დაუჭერს“.
„ეს შეთანხმება თუ გაფორმდება, რუსეთი აბსოლუტური გამარჯვებული გამოვა“, – განაცხადა სლოვაკეთის მთავრობის მეთაურმა.
მისივე თქმით რუსეთი გაძლიერდება „მორალურად და ეკონომიკურად“.
ფიცოს აზრით, ეს „სამშვიდობო გეგმა“ უკრაინისთვის უარესია, ვიდრე 2022 წლის სტამბოლის შეთანხმებები. როგორც ფიცომ აღნიშნა, ამ გეგმაში იგი ხედავს შესაძლებლობას, რომ ფრონტის ხაზზე დაუყოვნებლივ მოხდეს ცეცხლის შეწყვეტა.
ფიცომ ასევე გააკრიტიკა ევროკავშირის საგარეო პოლიტიკა და აღნიშნა, რომ „სამშვიდობო გეგმა“ ითვალისწინებს ევროკავშირის მხრიდან უკრაინის აღდგენაში 100 მილიარდის ინვესტიციის დაბანდებას ისე, რომ ევროკავშირს არაფერს ეკითხებიან“.
შეგახსენებთ, უკრაინულმა მედიამ რუსეთ-უკრაინის ომის დასასრულებლად დონალდ ტრამპის „სამშვიდობო გეგმის“ შინაარსი გამოქვეყნა. ომის დასრულების გეგმა 28 პუნქტს შეიცავს.
ტრამპის „სამშვიდობო გეგმის“ მიხედვით, რუსეთი მეზობელ ქვეყნებში არ შეიჭრება; ამასთან, უკრაინა კონსტიტუციაში ჩაწერს, რომ ნატო-ში არ შევა. გეგმის მიხედვით, ალიანსი არ გაფართოვდება და უარს იტყვის გაფართოებაზე.
აშშ-ის პრეზიდენტის „სამშვიდობო გეგმაში“ საუბარია ტერიტორიულ საკითხებზეც. კერძოდ, ოკუპირებული ყირიმი და ლუგანსკისა და დონეცკის რეგიონები დე ფაქტო აღიარებული იქნებიან რუსულ რეგიონებად; ხერსონისა და ზაპოროჟიეს რეგიონებში საზღვარი ამ დროისთვის არსებულ ფრონტის ხაზზე გავა, უკრაინული ძალები კი გავლენ დონეცკის ოლქის იმ ნაწილიდან, რომელსაც ისინი ამჟამად აკონტროლებენ.
აშშ მოითხოვს, რომ უკრაინა „უიტკოფ-დმიტრიევის სამშვიდობო გეგმას“ 27 ნოემბრამდე დაეთანხმოს.
ევროპელი ლიდერების ჯგუფი, სავარაუდოდ, რუსეთ-უკრაინის ომის დასრულების გეგმის განსხვავებულ ვერსიაზე მუშაობს, რომელიც უკრაინისთვის მეტად სამართლიან პირობებს ითვალისწინებს, ვიდრე ეს აშშ-ის პრეზიდენტის, დონალდ ტრამპის ადმინისტრაციის მიერ შემუშავებულ 28-პუნქტიან დოკუმენტშია გათვალისწინებული. როგორც მედია წერს, ევროპელი ლიდერები იმედოვნებენ, რომ ომის დასრულების ალტერნატიული წინადადება უკრაინისთვის უფრო მისაღები იქნება და კიევი სწორედ მათ გეგმას დაუჭერს მხარს. ევროპელების მოლოდინია, რომ „ევროპულ გეგმაზე“ მუშაობა უახლოეს დღეებში დასრულდება.
სამშვიდობო შეთანხმებისკენ იძულების მიზნით, აშშ უკრაინას სადაზვერვო ინფორმაციისა და იარაღის შეწყვეტით ემუქრება. ანონიმური წყაროების ცნობით, კიევზე ვაშინგტონის მხრიდან უფრო დიდი ზეწოლა იყო, ვიდრე წინა სამშვიდობო მოლაპარაკებების დროს და აშშ-ს სურს, უკრაინამ შეთანხმების ჩარჩოდოკუმენტს მომდევნო ხუთშაბათისთვის მოაწეროს ხელი. აშშ-ის სამხედრო მაღალჩინოსნების დელეგაცია კიევში პრეზიდენტ ვოლოდიმირ ზელენსკის შეხვდა. უკრაინაში აშშ-ის ელჩმა შეხვედრას წარმატებული უწოდა. „როიტერის“ თანახმად, ვაშინგტონი აშშ-სა და უკრაინას შორის დოკუმენტის ხელმოწერისთვის „აგრესიული ვადების“ დადგენას ცდილობდა.
გუშინ, 21 ნოემბერს, უკრაინის პრეზიდენტმა, ვოლოდიმირ ზელენსკიმ ვიდეომიმართვა გაავრცელა, რომელშიც აღნიშნა, „უკრაინა შეიძლება, ძალიან რთული არჩევანის წინაშე აღმოჩნდეს, ან ღირსების, მთავარი პარტნიორის დაკარგვის რისკი, რთული 28 პუნქტი, ან უკიდურესად რთული ზამთარი“.
