დაცული ტერიტორიების სააგენტო, ბუნების კონსერვაციისა და მონიტორინგის პარალელურად, ეკოტურიზმის განვითარებას აგრძელებს - ინფორმაციას სააგენტო ავრცელებს.
„2025 წელს სააგენტოს დაგეგმილი აქვს არაერთი მნიშვნელოვანი პროექტი, რისთვისაც ჯამში, 9 მილიონ ლარზე მეტი დაიხარჯება, როგორც სახელმწიფო ბიუჯეტის ისე საკუთარი შემოსავლების ფარგლებში.
მასშტაბური პროექტების გარდა, დაცულ ტერიტორიებზე განხორციელდება ეკოტურისტული ინფრასტრუქტურის განახლება, განვითარება და დამატება, რათა საქართველოს დაცულ ტერიტორიებზე მოგზაურობა გახდეს მეტად მრავალფეროვანი, უსაფრთხო და კომფორტული.
თბილისის ეროვნულ პარკში ეკოტურისტული ინფრასტრუქტურის განვითარების პროექტის ფარგლებში, გასულ წელს დაიწყო და წელს დასრულდება ვიზიტორთა ცენტრების, ბილიკების ქსელის და შესაბამისი ინფრასტრუქტურის, ბავშვთა გასართობი სივრცეების, ამფითეატრის მშენებლობა, რაც პარკს უფრო მიმზიდველს გახდის ბუნებაში დასვენებისა და ლაშქრობის მოყვარულებისთვის.
2023 წელს საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდთან თანამშრომლობით დაიწყო და მიმდინარე წელს დასრულდება 240 კმ-მდე საცხენოსნო და საფეხმავლო ბილიკების მოწყობა თანმდევი ინფრასტრუქტურით, მათ შორის, კომფორტული კოტეჯებით. პროექტი მოგზაურებს საშუალებას მისცემს აღმოაჩინონ უნიკალური ბუნება და შთამბეჭდავი პეიზაჟები.
გასულ წელს დაიწყო და წელს დასრულდება ბირთვისის კანიონის ბუნების ძეგლის ნაწილზე ეკოტურისტული ინფრასტრუქტურის მშენებლობა. უშუალოდ ბირთვისის კანიონზე მოეწყობა ვიზიტორთა ცენტრი, გადასახედი პლატფორმა, სამი დაკიდებული ხიდი, საქანელა, კოტეჯები, ვია ფერატა („რკინის გზა“ სპეციალური მარშრუტი კლდოვან რელიეფზე გადაადგილებისთვის) და ზიპლაინი (გაჭიმულ კაბელზე მოძრავი როლერი).
აღსანიშნავია, რომ 2024 წელს დასრულდა 223 კმ სიგრძის ბილიკების ქსელის მოწყობა თანმდევი ინფრასტრუქტურით ერუშეთის, ბორჯომ-ხარაგაულის, კინტრიშის და მტირალას ეროვნულ პარკებში.
დღეისთვის, საქართველოს 100 დაცულ ტერიტორიაზე, ჯამში, 111 სხვადასხვა სირთულის ბილიკით სარგებლობაა შესაძლებელი“ – ნათქვამია ინფორმაციაში.
