სოციალური მედია ჩვენი ცხოვრების განუყოფელ ნაწილად იქცა – ყოველდღიურად ვიძირებით უსასრულო კონტენტის ნაკადში. ის არა მხოლოდ ერთმანეთთან გვაკავშირებს, არამედ ახალ ტენდენციებს ქმნის და გავლენას ახდენს ყოველდღიური ცხოვრების თითქმის ყველა ასპექტზე, მათ შორის რეკლამაზეც.
დასრულდა ბეჭდური რეკლამებისა და სატელევიზიო რგოლების ეპოქა. ახალ თაობას რეკლამა პირდაპირი წყაროდან მიეწოდება ინფლუენსერების მეშვეობით. მიუხედავად იმისა, რომ ეს შეიძლება გაყიდვებზე ორიენტირებულ საეჭვო პრაქტიკად მოგეჩვენოთ, რეალობა სხვა რამეს ამტკიცებს: ჯენზი თაობა ინფლუენსერებს რეკლამის დამკვეთებზე, ანუ ბრენდზე მეტად ენდობა, ერთ-ერთი მთავარი მიზეზის გამო, რომელსაც ავთენტურობა ჰქვია.
ბოლო კვლევაში Adobe Express-მა 2 000 ბრიტანელი გამოკითხა, რათა გაეგო, როგორ აისახა ინფლუენსერმარკეტინგზე გადასვლა სარეკლამო ინდუსტრიაზე. კვლევის მიხედვით, ჯენზის მეოთხედი (25%) ინფლუენსერების მიერ ბრენდირებულ კონტენტზე გავლენას განიცდის. მიუხედავად იმისა, რომ მხოლოდ 5% თვლის ინფლუენსერებს გულწრფელად, ჯენზის თითქმის ცხრა წარმომადგენელი ათიდან (88%) მაინც ენდობა მათ რეკლამას.
სად ჩნდება აქ ავთენტურობა? მონაცემების მიხედვით, ჯენზის 38%-ს არ მოსწონს კონტენტი, რომელიც წინასწარ დაწერილად ან ხელოვნურად გამოიყურება, ხოლო 30% უპირატესობას ანიჭებს ინფლუენსერს, რომელიც რეალურად იყენებს იმ პროდუქტს, რომელსაც არეკლამებს. ფაქტია, რომ ეს ის თაობაა, რომელიც ტყუილს ადვილად ამოიცნობს. შესაბამისად კი, მათ რეალური, დაუფარავი და გულწრფელი კონტენტი სურთ.
სამწუხაროდ, ამ ტენდენციის გამოყენება ისეთივე მარტივი არ არის, როგორც ინფლუენსერისთვის პროდუქტის გაგზავნა და მისი 30-წამიან რეკლამაში გამოყენება. იქნება ეს დახვეწილი unboxing ვიდეოები თუ ყოველდღიური ვლოგები, ჯენზი ყურადღების მიპყრობა ავთენტურ პრომოზეა დამოკიდებული, ისეთზე, რომელიც ორგანულად ერწყმის კონტენტს. აქ კონტექსტი გადამწყვეტია.
ინტერნეტის ეპოქაში გაზრდილი ახალი თაობა დაღლილია რეკლამებით, რომლებსაც ვერ გადაახვევ, აგებულია ზედმეტად „ჭკვიანურ“ კამპანიებზე და მანიპულირებას ცდილობს. გასაკვირი არც არის, რომ ბევრი ბრენდი ვერ ახერხებს ჯენზისთან სწორ კომუნიკაციას. მათ არ აინტერესებთ ბრენდის ისტორია ან პრიალა მარკეტინგი – მათთვის ყველაფერი გამჭვირვალობასა და სიმართლეზე გადის.
რეკომენდაციები გავრცელებული პრაქტიკიდან:
- ინტერაქციული გამოწვევების წამოწყება
მაგალითად, როცა საკვების ბრენდი აწყობს გამოწვევას TikTok-ის ინფლუენსერთან ერთად, რომელშიც აზიარებს რეცეპტებს და იყენებს ამ ბრენდის პროდუქტებს. საზოგადოება აქტიურად არის ჩართული და რჩება განცდა, რომ უყურებ მომხმარებლის მიერ გენერირებულ კონტენტს, რომელიც ზრდის კამპანიის მასშტაბებს.
- მომხმარებლის მიერ გენერირებული კონტენტის გამოყენება ნდობის გასამყარებლად
ბრენდი უგზავნის პროდუქტს რეალურ მომხმარებელს და სთხოვს მას პატარა ვიდეოს ჩაწერას, სადაც ის გამოიყენებს ამ პროდუქტს და თავის შეფასებებს ვიდეოში მოჰყვება. საუკეთესო პოსტები შემდეგ გაზიარდება ბრენდის სოციალური მედიის არხებზე. ეს სტრატეგია არა მხოლოდ ხელს უწყობს საზოგადოებასთან ურთიერთობას, არამედ ქმნის სანდო კონტენტს, რომელიც არწმუნებს პოტენციურ მომხმარებლებს.
- Meme მარეკეტინგი
ტექნიკა, სადაც ბრენდები ქმნიან კონტენტს, რომელიც ვირუსულად ვრცელდება. ასეთი კონტენტი ხშირად არ არის პირდაპირ გასაყიდად მიმართული რეკლამა, არამედ უფრო კულტურულ რეაქციას ქმნის, რომელიც ცხოვრების სტილთან და გართობასთან ასოცირდება. მაგალითად, Duolingo-ს და სხვა ბრენდები იყენებენ იუმორსა და იდენტიფიცირებად მიმებს, რაც ამყარებს ურთიერთობას შერჩეულ აუდიტორიასთან და გაზიარების ალბათობასაც ზრდის.
