Google-ი, ონლაინ შოპინგის დროს, AI-ს დახმარებით ტანსაცმლის გასინჯვის სერვისს ნერგავს. საძიებო გიგანტის ვებსაიტზე ნათქვამია, რომ Google-მა ჩაუშვა ფუნქცია, რომელიც მომხმარებელს დაეხმარება გაიგოს, მოერგება თუ არა ონლაინ შერჩეული ტანსაცმელი. ეს შესაძლებელი იქნება, ფოტოებისა და ამოცნობის ტექნოლოგიის გამოყენებით.
ეს იდეა დიდი ხანია არსებობს. კომპიუტერის პროგრამები, რომლებიც ადამიანს ვარცხნილობის არჩევაში ეხმარებოდნენ, 10 წლის წინაც არსებობდა. თუმცა, მხოლოდ ნეირონულ ქსელში არსებულმა ინოვაციებმა გახადა შესაძლებელი ამ პროცესის მაქსიმალურად გაუმჯობესება.
ტანსაცმლის ახალი ვირტუალური გასინჯვის ფუნქცია საშუალებას იძლევა დაინახოთ, როგორ მოერგება ტანსაცმელი სხეულის ნებისმიერ ფორმას, XXS-დან 4XL-მდე. ტანსაცმელი განთავსდება სხვადასხვა ეთნიკური წარმომავლობის, კანის ფერის, თმის ტიპის მოდელების სურათებზე, რომლებიც კომპანიამ ამ ფუნქციის შემუშავებისას გადაიღო.
ამ დროისთვის ახალი ფუნქცია მუშაობს მხოლოდ აშშ-ში. სხვა ქვეყნების მცხოვრებლები როდის შეძლებენ ამ სერვისის გამოყენებას, უცნობია.
მომხმარებლებმა უბრალოდ უნდა დააწკაპუნონ ძიებაში გასინჯვის ღილაკზე, შემდეგ შეარჩიონ მოდელი, რომელიც მათი აზრით საუკეთესოდ შეეფერება მათივე ფიგურას.
Google-ი აცხადებს, რომ მან ასეთი სერვისის ჩაშვება სურათზე დაფუძნებული ხელოვნური ინტელექტის ახალი მოდელის წყალობით შეძლო. საცდელი ფუნქციის დანერგვა დაიწყება ქალის პროდუქტებიდან, შემდეგ კი მამაკაცის ტანსაცმელიც გამოჩნდება.
