საქართველოს ეროვნული ლატარიის გათამაშება ლოტო ,,5/35-ოქროს ბურთის“ ისტორიაში რეკორდი დაფიქსირდა. 70 წლის პროფესიით ფიზიკოსმა და ამჟამად პენსიონერმა გულქანი თოთაძემ ჯეკპოტი 506 729 ლარი მოიგო. როგორც იღბლიანი მოთამაშე „კომერსანტთან“ საუბრისას აცხადებს, ის „ოქროს ბურთის“ დაარსების დღიდან, 4 წლის განმავლობაში, ყოველ დღე თამაშობდა ლოტოს, პატარ-პატარა მოგებები აქამდეც ჰქონდა, მაგრამ დიდი თანხა ჯერ არ მოუგია.
„ერთი დღე არ ჩამიგდია, აბსოლუტურად ყოველ დღე, მიზანმიმართულად ვთამაშობდი. პატარა მოგებები აქამდეც მქონდა - 30, 40, 100 ლარი. იღბლიანი ლოტოს ბილეთი მუხიანის ჯიხურში ვიყიდე. ჯეკპოტი 18 მაისს გათამაშდა, მე 19-ში გავიგე. სახლში ისე შეჩვეულები იყვნენ ჩემს პატარა მოგებებს, რომ დავრეკე და ჩემს შვილს ვუთხარი - ჯეკპოტი მოვიგე თქო, არ სჯეროდა,“ - გვიყვება გულქან თოთაძე.
მას მოგებული თანხით ეზოიანი სახლის ყიდვა უნდა. ამბობს, რომ კორპუსის ბინაში ცხოვრება აღარ სურს და ყოველთვის ოცნებობდა ყვავილებიან ბაღსა და ბუნებასთან სიახლოვეზე. ქალბატონი გულქანი ამ მოგებაზე გაჩერებას არ აპირებს და თამაში გაგრძელებას ახალი ჯეკპოტის მოგების იმედით გააგრძელებს.
„თუ ვერ იგებ, აქ გასაღიზიანებელი არაფერია, თუ მიზანმიმართულად გინდა ამოგება, თამაში გართობს და გახალისებს, რატომ არ უნდა ითამაშო? ახლა ცოტა ტაიმაუტს ავიღებ, დავმშვიდდები და თავისუფლად გავაგრძელებ თამაშის მეორე რაუნდს.
რაც შეეხება ციფრების შერჩევას, პროფესიით ფიზიკოსი ვარ. ციფრები ჩემი სტიქიაა. რა არ ვცადე, ავტობუსის განრიგი, დაბადების დღეები, ბედნიერი, ცუდი დღეები... ვფიქრობდი, რაიმე კანონზომიერება ხომ არ იყო, მაგრამ არა! მოგებული ლოტოს ბილეთის შემთხვევაში ციფრები სპონტანურად შევარჩიე“, - აცხადებს გულქან თოთაძე.
ლატარიის კომპანიას უყურადღებოს არ დაუტოვებია მეჯიხურე ინგა ტეფნაძე, რომელმაც საკუთარ დაბადების დღეზე ჯეკპოტი გაათამაშა, მას ყველაზე იღბლიანი მეჯიხურის წოდება და ფულადი პრემია გადაეცა.
საქართველოს ეროვნული ლატარიის კომუნიკაციების ხელმძღვანელმა ნინო პორტჟებსკაიამ განაცხადა, რომ საქართველოს ეროვნულმა ლატარიის კომპანიამ თავისი მოღვაწეობის პერიოდში, 2018 წლიდან დღემდე - 80 მლნ ლარი გაათამაშა.
„დღეს სასიხარულო დღეა. ქალბატონ გულქანს გადავეცით ნახევარ მილიონზე მეტი ლარი,
საქართველოს ლატარიის კომპანიამ თავისი მოღვაწეობის პერიოდში 80 მლნ ლარი გაათამაშა - ასეთი შთამბეჭდავი თანხა გადაეცა ლოტოს და ლატარიის მოთამაშეებს. ბედნიერები ვართ, რომ ადამიანებს ვაბედნიერებთ“, - განაცხადა ნინო პორტჟებსკაიამ.
