როგორ მიმდინარეობს პროფესიულ საგანმანათლებლო დაწესებულებებში ჩარიცხვის მსურველ აპლიკანტთა შერჩევის ეტაპი ამის შესახებ საგანმანათლებლო დაწესებულებების წარმომადგენლებმა რადო „კომერსანტის“ ეთერში, თაი სიბოშვილის გადაცემაში – „პროფესიული განათლების ნავიგატორი“ ისაუბრეს.
კოლეჯი „ინფორმაციული ტექნოლოგიების აკადემიის“ წარმომადგენლის მამუკა ჯანჯალიას თქმით, ზოგადად პროფესიულ პროგრამებზე წელს უპრეცედენტოდ ბევრი აპლიკანტი დარეგისტრირდა და ამ მხრივ გამონაკლისი არც „ინფორმაციული ტექნოლოგიების აკადემიაა“.
„მისაღები კონტინგენტი გვყავს 400 ადამიანი და დაახლოებით 1800 ადამიანი არის დარეგისტრირებული. ჩვენი კოლეჯი არის IT მიმართულების, 6 პროგრამაზეა გამოცხადებული მიღება და არის ძალიან დიდი კონკურსი. ეს ჩვენთვის ძალიან დიდი გამოწვევაა. წელს მიღება გვაქვს შემდეგ პროგრამებზე: მე-5 დონის პროგრამა - ქსელის ადმინისტრატორი, მე-4 დონის - ქსელები და სისტემები, ვებ ტექნოლოგიები, ასევე არის ვებ ტექნოლოგიების ინტეგრირებული პროგრამა, სადაც 9 კლასდამთავრებულებს შეუძლიათ სწავლის გაგრძელება. ასევე გვაქვს ინტეგრირებული ინფორმაციის ტექნოლოგია მე-3 დონის, და მე-4 დონის ინტეგრირებული ქსელები და სისტემები.“- განაცხადა მამუკა ჯანჯალიამ. მისი თქმით, კოლეჯში ასევე ჩაირიცხა 13 სპეციალური საგანმანათლებლო საჭიროების მქონე სტუდენტი.
რაც შეეხება კოლეჯ „იკაროსს“. კოლეჯის წარმომადგენლის რუსუდან ჩართოლანის თქმით, საგანმანათლებლო დაწესებულების მთავარ მიმართულებას ტურიზმი და მომსახურების სფერო წარმოადგენს და სხვა კოლეჯების მსგავსად მიმართვიანობა მათთანაც განსაკუთრებით მაღალია. რუსუდან ჩართოლანის თქმით, დარეგისტრირებული 1600 აპლიკანტი, მათ შორის 900 კულინარიის ხელოვნებაზე.აქედან განსაკუთრებით მაღალი კონკურსია კულინარიის დუალურ პროგრამაზე სადაც 7 ადგილზე 350 აპლიკანტი მოდის.
„კონკურსი გვაქვს ძალიან დიდი. კომისიაც ძალიან სერიოზული გვაქვს შედგენილი, ესენი არიან მოწვეული სპეციალისტები სასტუმროებიდან, რესტორნებიდან. შერჩევის პროცედურა 10 დღის განმავლობაში იქნება,“ - განაცხადა რუსუდან ჩართოლანმა.
„იკაროსის“ წარმომადგენელმა შერჩევის პროცესი დეტალურად მიმოიხილა და აღნიშნა, რომ კოლეჯში ყველაზე პოპულარული მიმართულებები კულინარია და კონდიტერიაა. შერჩევის პროცესი 2 ნაწილისგან შედგება სამოტივაციო გასაუბრება და პრაქტიკული მოსინჯვა, რაც გულისხმობს შეფის მიერ მომზადებული მარტივი კერძის გამეორებას სტუდენტის მიერ. ორივე პროცესი ერთად ფასდება, ჯამდება ქულები და იტვირთება სისტემაში.
„საოცარი ბავშვები მოვიდნენ და ვიმედოვნებ რომ საუკეთესოები შეირჩევა,“ - აღნიშნა რუსუდან ჩართოლანმა.
რაც შეეხება „ინფორმაციული ტექნოლოგიების აკადემიას“, მამუკა ჯანჯალიას თქმით, საბაზო უნარების შესაფასებლად ჩატარდა ტესტირება, ამჯერად კი გასაუბრების ეტაპი მიმდინარეობს.
როგორ მიმდინარეობს რეგიონებში მდებარე პროფესიულ საგანმანათლებლო დაწესებულებებში აპლიკანტთა შერჩევის პროცესი. ამის შესახებ გადაცემაში იმერეთში მდებარე კოლეჯ „კონსტრუქტ2“-ის წარმომადგენელმა თამარ ზაქარაშვილმა ისაუბრა.
კოლეჯი საჯარო-კერძო პარტნიორობითაა შექმნილი, ის „ბიქეი ქონსთრაქშენის“ და განათლებისა და მეცნიერების სამინისტროს საერთო პროექტია და ძირითადი მიმართულება სამშენებლო განათლებაა.
„დაწესებულებაში გვაქვს 2 მიმართულება, საგანმანათლებლო პროგრამა და მოკლევადიანი მომზადების პროგრამები. საგანმანათლებლო პროგრამაზე გავცემთ სახელმწიფოს აღიარებულ დიპლომს. მოკლევადიანი მომზადების პროგრამებზე სახელმწიფოს აღიარებულ სერტიფიკატს. აღნიშნულ პროგრამები არის დაფინანსებული განათლებისა და მეცნიერების სამინისტროს მიერ და სტუდენტებისთვის არის უფასო. კოლეჯს აქვს საერთო საცხოვრებელი. რომელიც სტუდენტებისთვის უფასოა. მოკლევადიან პროგრამაზე 2 თვე სწავლა სასწავლებლის ბაზაზე მიმდინარეობს, შემდგომი 2 თვე კი საწარმოო პრაქტიკას ეთმობა ბიქეი ქონსთრაქშენის რომელიმე ობიექტზე. მოკლევადიან პროგრამაზე მიღება სამოტივაციო გასაუბრების მეშვეობით ხდება. კომპანია სტუდენტებს სტიპენდიასაც სთავაზობს, 4.5 თვიანი პროგრამის მიმდინარეობისას გაიცემა ჯამში 2000 ლარამდე სტიპენდია. წელს მომართვიანობა 8-10 ჯერ არის გაზრდილი,“ - განაცხადა თამარ ზაქარაშვილმა.
გადაცემაში ხაზი გაესვა იმას, რომ საჯარო კოლეჯებში პროფესიის დაუფლება სტუდენტებისთვის უფასოა და სრულად ფინანსდება სახელმწიფოს მიერ.
გადაცემის სტუმრებმა აღნიშნეს, რომ მათი პროფესიული სასწავლებლების კურსდამთავრებულებს შორის დასაქმების მაღალი პროცენტია.
