„ქვეყანაში 1.5 მლნ ავტომობილია რეგისტრირებული, აქედან საშუალოდ 50% ტექინსპექტირებას ვერ გადის, მეორე ნახევარი ნათხოვარი ავტონაწილებით ახერხებენ ტექინსპექტირების გავლას. ფაქტობრივად გამოვიდა, რომ ტექინსპექტირების რეფორმა ჩავარდა“, - ამის შესახებ რადიო „კომერსანტის“ ეთერში საქართველოს ავტო იმპორტიორთა ასოციაციის დამფუძნებელმა ალექსი ნონიაძემ ავტომობილების ევრო5-ის სტანდარტზე გადასვლის რეფორმაზე საუბრისას განაცხადა. მისი თქმით, ამის მიზეზი ის არის, რომ მოქალაქეების უმრავლესობას ამორტიზებული ავტომობილები აქვს. 

„მოქალაქეების უმრავლესობას აქვს ამორტიზებული ავტომობილები, რომელთა ტექნიკური გამართვა ფინანსურად შეუძლებელია, ან არ მიუწვდებათ ხელი. თუ ფინანსური შესაძლებლობა არ აქვთ, მაშინ ისინი ვერც 2013 წლის ზემოთ გამოშვებულ ავტომობილებს იყიდიან“, - აცხადებს ალექსი ნონიაძე.

შეგახსენებთ, რომ 2024 წლიდან საქართველოში 2013 წლამდე გამოშვებული ავტომობილების იმპორტი აიკრძალება და შეიზღუდება ავტომობილების კატალიზატორების ექსპორტი. რაც იმას ნიშნავს, რომ ქვეყანა ავტომობილების ევრო5-ის სტანდარტზე გადადის. ამ რეგულაციების დაწესების მიზეზი ჰაერის დაბინძურების მაჩვენებლებისა და ხარისხის გაუმჯობესებაა.

ალექსი ნონიაძის თქმით, თუ სახელმწიფო მკაცრად მიუდგება საქმეს, შეზღუდვებს და გაატარებენ რეფორმებს, მოსახლეობის ნახევარი შეიძლება ტრანსპორტის გარეშე დარჩეს, რაც ქვეყნის ეკონომიკაზე აისახება.

„ტრანსპორტში გაჩნდება დეფიციტი, ნებისმიერი პროექტის თვითღირებულებას გაზრდის და გამოიწვევს ინფლაციას. აუცილებლად გაძვირდება ავტომობილები იმიტომ, რომ მოთხოვნა გაჩნდება. უახლესი მოდელები უფრო გაძვირდება, ვისაც 2013 წლამდე ავტომობილები ჰყავს  შეეცდება, რომ გაყიდოს. ვისაც ფინანსური შესაძლებლობა არ უწყობს ხელს, შეეცდება ძველი ავტომობილი შეინარჩუნოს და ეს რამდენად შეუწყობს ხელს ეკოლოგიური მდგომარეობის გაუმჯობესებას ძნელი სათქმელია. რაც მნიშვნელოვანია, ტექ-მომსახურებაც გაძვირდება. საბოლოო ჯამში, მივდივართ იქამდე, რომ სატრანსპორტო სფეროში შეიძლება დეფიციტი გაჩნდეს“, - აცხადებ ალექსი ნონიაძე.

მისი თქმით, გამოსავალი მოქალაქეებისთვის ავტომობილების შესაცვლელად მეტი დროის მიცემა და აქციზის გადასახადის დაკლებაა.

„ამის შესახებ პრემიერს წერილობითაც მივმართეთ. გამოსავალი არის ის, რომ 2-3-წლიანი ვადა ვადა მისცენ მოქალაქეებს. თუ ვინმეს მანქანის შეცვლის, ან რემონტის ფინანსური შესაძლებლობა არ აქვს, ბანკიდან მაინც გამოიტანენ ვალს. ამას გარდა, სახელმწიფომ აქციზის გადასახადი უნდა დააკლოს, რომ მეორადი ავტომობილის შემოტანა ფინანსურად ხელმისაწვდომი იყოს,“ - აცხადებს ალექსი ნონიაძე.