„ძალიან ბევრ ადამიანს არ აქვს ინფორმაცია იმის შესახებ, უფასოდ რა სერვისებით სარგებლობა შეუძლიათ მიწის სისტემური რეგისტრაციისას“, - ამის შესახებ როგორც რადიო „კომერსანტის“ ეთერში იურისტი გვანცა ჟორჟოლიანი აცხადებს, მისი თქმით, მოქალაქეებს, ამ რეფორმის ფარგლებში, ბევრი უფასო სერვისით სარგებლობა შეუძლიათ. მათ შორის: აზომვითი ნახაზების მომზადება, მიწის რეგისტრაცია და სხვა.
„ძალიან ბევრ ადამიანს არ აქვს ინფორმაცია იმის შესახებ, უფასოდ რა სერვისებით სარგებლობა შეუძლიათ ამ რეფორმის ფარგლებში. ისინი მიიღებენ ძალიან ბევრ სერვისს უფასოდ. მათ შორის აზომვითი ნახაზების მომზადება, აზომვითი ნახაზების კორექტირება, მიწის რეგისტრაცია, მომიჯნავე მიწის ნაკვეთებზე მეზობლებთან გარიგებასაც უფასოდ დაურეგისტრირებს საჯარო რეესტრი. სამეზობლო დავის შემთხვევაში შეუძლიათ უფასოდ სარგებლობა სანოტარო მედიაციით, აქვთ ამის უფლება, მაგრამ არ აქვთ ინფორმაცია“, - აცხადებს ადვოკატი.
მიწების სისტემური რეგისტრაციის რეფორმა 2022 წელს დაიწყო და 2025 წლის 1-ელ იანვარს დასრულდება. გვანცა ჟორჟოლიანის თქმით, ქვეყნის მიწების ტერიტორიის 1/3 დაურეგისტრირებელია. თუმცა, რეალურად ხდება ამ მიწების გამოყენება მოქალაქეების მხრიდან. ეს რეფორმა ეხება მთლიანად საქართველოს, მაგრამ არ ვრცელდება ოკუპირებულ ტერიტორიებზე და თვითმმართველ ქალაქებზე - თბილისზე, ბათუმზე, ქუთაისზე, ფოთსა და რუსთავზე.
რა არის მიწის სისტემური რეგისტრაცია?
გვანცა ჟორჟოლიანი რადიო „კომერსანტის“ ტრადიციულ რუბრიკაში დეტალურად განმარტავს რა არის მიწის სისტემური რეგისტრაცია:
„ეს არის პროცესი, როცა სახელმწიფომ თავის თავზე და საკუთარი ინიციატივით გადაწყვიტა მიწების აზომვა და რეგისტრაცია. მოქალაქეები, რომლებიც ფლობენ მიწის ნაკვეთებს, მაგრამ არ აქვთ რეგისტრირებული, ან ხარვეზიანი დოკუმენტების გამო ვერ მოხდა მათი მიწის რეგისტრაცია, ან სამეზობლო დავა აქვთ, ან აზომვითი ნახაზის საფასურის გადახდა ვერ მოახერხეს, ახლა აქვს შესაძლებლობა, რომ სრულიად უფასოდ, რეფორმის ფარგლებში, მოახდინოს აღნიშნული მიწის ნაკვეთის რეგისტრაცია“, - განმარტავს გვანცა ჟორჟოლიანი.
მიწის სისტემური რეგისტრაციის ეტაპები
იურისტის თქმით, თქმით, მიწის სისტემური რეგისტრაცია შემდეგ ეტაპებს მოიცავს: ეს არის აზომვითი ნახაზის მომზადება, ამის საჯაროდ გამოცხადება და რეგისტრაცია.
„რეფორმა დაიწყო 2022 წელს და გათვლილია 59 მუნიციპალიტეტზე, რომელიც პლუს ჩაშლილია 1000-ზე მეტ ადმინისტრაციულ ერთეულზე. რა თქმა უნდა, 2022 წლიდან 2025 წლამდე საქართველოს მთელ ტერიტორიაზე ვერ მოხდება ერთდროულად საველე სამუშაოების ჩატარება, ამიტომ სახელმწიფომ შეიმუშავა გეგმა, მუნიციპალიტეტები დაყო, რომელ პერიოდში, რომელ პერიოდში სად დაიწყება ეს პროცესი. შესაბამისად, როგორც კი გამოცხადდება შესაბამის მუნიციპალიტეტში მიწის სისტემური რეგისტრაციის დაწყება, მოქალაქეს აქვს უფლება, რომ მიმართოს შესაბამის მუნიციპალიტეტს განცხადების საფუძველზე. შემდეგ ხდება ამ მიწის ნაკვეთის აზომვა საჯარო რეესტრის ეროვნული სააგენტოს თანამშრომლების მიერ და აზომვითი ნახაზების გამოქვეყნება მუნიციპალიტეტის შენობებში. პიროვნებას, რომელსაც აქვს სურვილი, რომ დაირეგისტრიროს მიწის ნაკვეთი, მისი ნაკვეთის აზომვითი ნახაზი შესრულდა და გამოქვეყნდა მუნიციპალიტეტის შენობაში, ერთი თვის ვადა აქვს, რომ გაეცნოს რამდენად სწორად მოხდა აზომვითი ნახაზის შედგენა და თუ არ მოსწონს და არ ეთანხმება, აქვს უფლება, მოსთხოვოს საჯარო რეესტრის ეროვნულ სააგენტოს, აზომვითი ნახაზის კორექტირება“, - აცხადებს გვანცა ჟორჟოლიანი.
პარალელურ რეჟიმში, როგორც სააგენტო, ისე მოქალაქე ვალდებულია, დაიწყონ დოკუმენტების მოძიება, რომ რეალურად მოქალაქე მართლა ფლობდა და იყენებს აღნიშნულ მიწის ნაკვეთს. მისი თქმით, დოკუმენტების სია ფართოა. ეს შეიძლება იყოს მიწის მიღება-ჩაბარების აქტი, საკომლო აღრიცხვის დოკუმენტი, სააღრიცხვო ბარათი, მიწის ტექნიკური დახასიათება, მიწის გადამხდელთა ერთიანი სია, ან სხვა დოკუმენტი, რომელიც მუნიციპალიტეტიდანაა გაცემული, ეს შეიძლება იყოს სასამართლო აქტი, მებაღის წიგნაკები, ან რაიმე ტიპის დოკუმენტი, სადაც დასტურდება, რომ მოქალაქე, ან მისი წინაპარი - ბებია, ბაბუა, ან მამა ამ მიწის ნაკვეთს იყენებდნენ.
შესაძლებელია თუ არა თვითნებურად დაკავებული მიწის ნაკვეთის რეგისტრაცია?
იურისტის განცხადებით, რეფორმის მიხედვით, თვითნებურად დაკავებული მიწის ნაკვეთის რეგისტრაცია შესაძლებელია, მაგრამ ამისთვის მოქალაქე რამდენიმე კრიტერიუმს უნდა აკმაყოფილებდეს.
„ეს შესაძლებელია, მაგრამ რეფორმა გვიწესებს გარკვეულ კრიტერიუმებს. ერთ-ერთი მთავარი კრიტერიუმი არის ის, რომ თვითნებურად უნდა გქონდეს დაკავებული აღნიშნული მიწის ნაკვეთი 2007 წლის 20 სექტემბრამდე. ამის შემდეგ თვითნებურად დაკავებულ ტერიტორიას მოქალაქეს არ დაურეგისტრირებენ. მეორე კრიტერიუმი არის ის, რომ ნაკვეთზე განთავსებული უნდა იყოს ან სახლი, ან რამე დამხმარე შენობა-ნაგებობა. აქაც პოზიტიურია რეფორმა და გვეუბნება, რომ არ აქვს მნიშვნელობა სახლის მდგომარეობას. ის შეიძლება იყოს დანგრეული, აშენებული, ან მშენებარე“, - ამბობს გვანცა ჟორჟოლიანი.
შესაძლებელია თუ არა თვითნებურად დაკავებული მიწის მომიჯნავე მიწის ნაკვეთის რეგისტრაცია?
რეფორმის ფარგლებში, მოქალაქეს იმის შესაძლებლობაც აქვს, რომ შეუძლია თვითნებურად დაიკავოს ის მიწის ნაკვეთი, თუ ფლობს მის მომიჯნავე ნაკვეთს. გასათვალისწინებელია ერთი გარემოება: დასარეგისტრირებელი მიწის ჯამური ფართობი ბარში არ უნდა აღემატებოდეს 1.25 ჰექტარს და მაღალმთიან რეგიონებში - 5 ჰექტარს.
„თუ მოქალაქემ თვითნებურად დაიკავა მიწის ნაკვეთი და აკმაყოფილებს ამ კრიტერიუმებს, მან განცხადებით უნდა მიმართოს სააგენტოს, მეორე - უნდა დაესწროს საჯარო რეესტრის ეროვნული სააგენტოს საველე ჯგუფის მიერ მიწის ნაკვეთის აზომვას და მიუთითოს საზღვრები, დაიყენონ მოწმეებად მომიჯნავე 2 ნაკვეთის მესაკუთრე, ან არამომიჯნავე 3 ნაკვეთის მესაკუთრე, რომლებიც დაუდასტურებენ, რომ ის მართლა იყენებს, ან მისი წინაპრები მართლა იყენებდნენ აღნიშნულ მიწის ნაკვეთს და ეს ხელმოწერით დაადასტურონ“, - აცხადებს გვანცა ჟორჟოლიანი.
სოციალური დაუცველის სტატუსის მქონე მოქალაქეებს, მიწის რეგისტრაციის შემდეგ, მოეხსნებათ თუ არა აღნიშნული სტატუსი?
მან ისიც თქვა, რომ სოციალური დაუცველის სტატუსის მქონე მოქალაქეებს მიწის რეგისტრაციის შემდეგ აღნიშნული სტატუსი არ მოეხსნებათ და არც დამატებითი გადასახადის გადახდა მოუწევთ.
„ვინც ისარგებლებს მიწის რეგისტრაციის სისტემური რეფორმით და სოციალური დაუცველის სტატუსი აქვს, ეს სტატუსი არ მოეხსენებათ. გადასახადებს რაც შეეხება, 2004 წლამდე თუ არის აღნიშნული მიწები მათ საკუთრებაში და ამ მიწებს ვარეგისტრირებთ, ამ შემთხვევაში ისინი მიწის გადასახადებისგანაც თავისუფლდებიან“, - აცხადებს გვანცა ჟორჟოლიანი.
