ჩუღურეთში ახალი სააღმზრდელო წლიდან საბავშვო ბაღის ორი შენობა შევა ექსპლუატაციაში. ამის შესახებ ინფორმაციას ჩუღურეთის რაიონის გამგეობა ავრცელებს.
ამავე ინფორმაციით, ერთ-ერთი მათგანი N125 ბაგა-ბაღია, სადაც თბილისის მერის მოადგილე კახა გულედანი დედაქალაქის საბავშვო ბაგა-ბაღების მართვის სააგენტოს ხელმძღვანელ გოგი ჩიქოვანთან ერთად იმყოფებოდა.
ოთარ ქინქლაძის ქუჩაზე მდებარე N125 საბავშვო ბაღის ძველი შენობის დემონტაჟი გასულ წლებში განხორციელდა, მის ნაცვლად კი სრულიად ახალი, თანამედროვე სტანდარტების შენობა აშენდა, რომელიც აღსაზრდელებს ახალი სააღმზრდელო წლის დასაწყისიდან მიიღებს. მშენებლობა დასრულებულია. ამ ეტაპზე, მიმდინარეობს ეზოსა და შიდა სივრცეების მოწყობა და ბაღის აღჭურვა.
კახა გულედანი სააგენტოს ხელმძღვანელთან ერთად, უშანგი ჩხეიძის ქუჩაზე მდებარე N2 ბაგა-ბაღში მიმდინარე სარეაბილიტაციო სამუშაოებსაც გაეცნო.
პროექტის ფარგლებში, რეაბილიტაცია უტარდება შენობის ისტორიულ ნაწილს. ასევე, აშენდა ახალი კორპუსი, სადაც ბაღის ძირითადი ნაწილი განთავსდება. 400 ბავშვზე გათვლილი ბაგა-ბაღის რეაბილიტაცია წლის ბოლოს დასრულდება.
თბილისის მერის მოადგილესთან ერთად, ადგილზე ჩუღურეთის რაიონის გამგებელი დავით მაქაცარია, ასევე, საკრებულოსა და პარლამენტის მაჟორიტარი დეპუტატები იმყოფებოდნენ.
