საქართველოს ეროვნული ბანკის მონაცემებით, 2023 წლის მაისის მდგომარეობით, ქვეყანაში მოქმედი იყო 95 630 საგადახდო ტერმინალი, რაც წინა წელთან შედარებით 13 400-ით, ანუ 16%-ით არის გაზრდილი.
2023 წლის მაისში საბანკო ბარათებით პოს-ტერმინალებით სულ 49.7 მილიონი გადახდა შესრულდა, ამ ტრანზაქციების საერთო მოცულობა კი 1.35 მილიარდი ლარი იყო. ანუ ერთი საშუალო ტრანზაქციის (ქვითრის) ღირებულება 27 ლარს შეადგენდა.
2022 წლის მაისთან შედარებით პოს-ტერმინალებით შესრულებული ოპერაციების რაოდენობა 38%-ით, ხოლო ამ გადახდების ჯამური მოცულობა 24%-ით არის გაზრდილი.
ტრანზაქციების რაოდენობის ზრდა ერთდროულად როგორც პოს-ტერმინალით გადახდის შესაძლებლობის მატებით, ასევე მომხმარებელთა ქცევის ცვლილებითაა განპირობებული, რაც უნაღდო ანგარიშსწორების დომინანტურ პოზიციაზე გადანაცვლებას უკავშირდება.
bm.ge