2026 წლის პირველ ნახევარში საქართველომ 78 133 ტონა შაქარი შეიძინა, რომლის საიმპორტო ღირებულებამ 37.87 მილიონი დოლარი შეადგინა. საქსტატის მონაცემებზე დაყრდნობით, ერთი წლის განმავლობაში იმპორტირებული შაქრის მოცულობა 37.7%-ით, ღირებულება კი 14.1%-ით გაიზარდა.
2025 წლის იანვარიდან ივნისის ჩათვლით საქართველოში 56 733 ტონა შაქარი შემოვიდა, რაშიც ქვეყანამ 33.16 მილიონი დოლარი გადაიხადა. მიუხედავად იმპორტის მოცულობის მკვეთრი ზრდისა, ერთი ტონა შაქრის საშუალო საიმპორტო ღირებულება 584.6 დოლარიდან 484.7 დოლარამდე შემცირდა, რაც დაახლოებით 17.1%-იანი კლებაა.
2026 წლის პირველ ექვს თვეში საქართველოსთვის შაქრის მთავარი მომწოდებელი პოლონეთი იყო. ამ ქვეყნიდან 21 615 ტონა პროდუქცია, 10.9 მილიონი დოლარის ღირებულებით შემოვიდა. მეორე ადგილზე სალვადორი იყო 17 000 ტონით და 7.1 მილიონი დოლარის ღირებულებით, მესამე ადგილზე კი ბრაზილია, საიდანაც საქართველომ 16 500 ტონა შაქარი, დაახლოებით 6.9 მილიონ დოლარად შეიძინა.
ამავე პერიოდში საქართველოდან 8 196 ტონა შაქარი გავიდა, ექსპორტის ღირებულებამ კი 5.1 მილიონ დოლარს მიაღწია. მთავარი საექსპორტო ბაზარი აზერბაიჯანი იყო, სადაც 4 479 ტონა პროდუქცია 2.5 მილიონ დოლარად გაიყიდა. ავღანეთში ექსპორტმა 3 406 ტონა და 2.3 მილიონი დოლარი შეადგინა, უზბეკეთში კი 310 ტონა შაქარი, 187 ათასი დოლარის ღირებულებით გავიდა.
შედარებისთვის, 2025 წლის მთლიან პერიოდში საქართველომ 145 503 ტონა შაქარი შეიძინა, რომლის ღირებულებაც 79.8 მილიონი დოლარი იყო. იმ წელსაც იმპორტის მოცულობა იზრდებოდა, თუმცა საშუალო საიმპორტო ფასი მცირდებოდა.
