„ბიზნესს ხარჯებს გაუზრდის“, - ასე აფასებს „ბიზნესპრესნიუსთან“ დამსაქმებელთა ასოციაციის თავმჯდომარე ელგუჯა მელაძე დაგეგმილ ცვლილებას, რომლის მიხედვითაც, კომპანიებში მანქანა-დანადგარების უსაფრთხოებაზე ინსპექტირება განხორციელდება.
საუბარია ახალ რეგლამენტზე, რომელზეც „შრომის ინსპექცია“ მუშაობს. კერძოდ, დადგინდება შრომის უსაფრთხოების ნორმები, სხვადასხვა ტიპის მანქანა-დანადგარებთან მუშაობის დროს. თემაზე მუშაობა გრძელდება, შეხვედრები უკვე გაიმართა არაერთ სექტორთან, მათ შორის, დამსაქმებლებთან.
ელგუჯა მელაძის თქმით, განსასაზღვრია ის, თუ ვინ დაადგენს კონკრეტულ საწარმოში არსებული მანქანა დანადგარი რამდენად უსაფრთხოა და რამდენად შეესაბამება სტანდარტებს. რესპონდენტი აღნიშნავს, რომ ამ კუთხით საჭირო იქნება ახალი შესაბამისი სპეციფიკის მქონე სამსახურის შექმნა.
„მნიშვნელოვანია, ვინ იქნება კომპეტენტური ორგანო, რომელიც გააკონტროლებს პროცესს. საუბარია შრომის ინსპექციაზე, მაგრამ გასათვალისწინებელია კომპეტენციის საკითხი, რადგან ინჟინერი, რომელმაც ზოგადად იცის შრომის უსაფრთხოების საკითხები, კომპეტენტური ვერ იქნება მანქანა-დანადგარების ტექნოლოგიურ ნაწილში. განსასაზღვრია, ვინ დაადგენს ესა თუ ის დანადგარი, იქნება თუ არა უსაფრთხო. აუცილებლად [გახდება საჭირო შესაბამისი სამსახურის შექმნა]. ისეთი სამსახური უნდა იყოს, რომელსაც ექნება შესაბამისი აკრედიტაცია, რომ დაადასტუროს დანადგარების უსაფრთხოება“, - ამბობს დამსაქმებელთა ასოციაციის თავმჯდომარე.
რაც შეეხება ვადებს, საუბარი იყო რეგულაციის 1-ლი ივლისიდან ამოქმედებაზე, მაგრამ დამსაქმებლებმა ინსპექციას გადავადების ინიციატივით მიმართეს, იქიდან გამომდინარე, რომ რეგულაციის მიღების შემდეგ, საჭირო იქნება დრო, ბიზნესების ინფორმირებისთვის.
„შემოთავაზებული იყო 1-ლი ივლისი, ჩვენ გადავადებაზე ვისაუბრეთ, რადგან ეს რეგლამენტი მნიშვნელოვანია და ყველა დაინტერესებული მხარის ჩართვა საჭიროა. ასევე, გვჭირდება გარკვეული პერიოდი ბიზნესის ინფორმირებისთვის. ბიზნესსაც შესაძლოა, ჰქონდეს რეგლამენტის შესახებ შენიშვნები. თუ გვინდა, რომ შევქმნათ უსაფრთხო გარემო, რეგულაცია უნდა მივიღოთ, მაგრამ არ უნდა მივიღოთ ისეთი ფორმით, რომ ამან გამოიწვიოს ბიზნესისთვის საქმიანობაში ხელის შეშლა“, - განაცხადა ელგუჯა მელაძემ.
