„2007 წლიდან მოყოლებული 20%-ითაა გაზრდილი ჩვენი ეკონომიკური დამოკიდებულება ავტორიტარულ ქვეყნებზე. ამას განაპირობებს ის, რომ რუსეთმა შეიცვალა სტატუსი და ჰიბრიდულიდან ავტორიტარულ რეჟიმის ქვეყნად ჩამოყალიბდა“, - ამის შესახებ რადიო „კომერსანტის“ ეთერში ეკონომიკური პოლიტიკის კვლევის ცენტრის დირექტორის მოადგილე ირინა გურულმა ქვეყნის ეკონომიკური დამოუკიდებლობის ინდექსზე საუბრისას განაცხადა. მისი თქმით, 2021 წელთან შედარებით, ჩვენი ქვეყნის ეკონომიკური დამოკიდებულება ავტორიტარულ ქვეყნებზე 7%-ითაა გაზრდილი, რადგან საგარეო ვაჭრობის მხრივ რუსეთზე, ჩინეთსა და აზერბაიჯანზე დამოკიდებულება გაიზარდა.
ირინა გურულის თქმით, ქვეყნის ეკონომიკური დამოუკიდებლობის ინდექსი USAID-ის ეკონომიკური მმართველობის პროგრამის მხარდაჭერით შემუშავდა. მისი მიზანი ეკონომიკური უსაფრთხოებისა და გეზის უკეთ შეფასებაა. ამასთან, ეკონომიკური ინდექსის დადგენისას, რამდენიმე ინდიკატორის გაზომვა ხდება, მათ შორის პირდაპირი უცხოური ინვესტიციები, საქონლის ექსპორტი, იმპორტი, საგარეო ვალი და ქვეყანაში შემომავალი ფულადი გზავნილები.
„მსოფლიოს ქვეყნები დემოკრატიის ინდექსის მიხედვით დავყავით - დემოკრატიულ, ნაწილობრივ დემოკრატიულ, ჰიბრიდულ და ავტორიტარული ტიპის ქვეყნებად და ეკონომიკური დამოკიდებულების ინდექსი ზემოთ ჩამოთვლილი ინდიკატორების საშუალო მაჩვენებლით გამოვიანგარიშეთ.
2022 წლისთვის 57% გადახრილები ვართ დემოკრატიული და ნახევრად დემოკრატიული ქვეყნებისკენ. ამის განმაპირობებელი ფაქტორი საგარეო ვალი და პირდაპირი უცხოური ინვესტიციებია. რაც შეეხება საგარეო ვაჭრობას და ფულად გზავნილებს, აქ უფრო მეტად გადახრილი ვართ ჰიბრიდული და ავტორიტარული ტიპის რეჟიმის ქვეყნებისკენ, როგორებიცაა - რუსეთი, ჩინეთი და აზერბაიჯანი“, - აცხადებს ირინა გურული.
მისი თქმით, ამ ეტაპზე ეკონომიკური უსაფრთხოების თვალსაზრისით, ჩინეთის როლი ნაკლებად მნიშვნელოვნადაა შეფასებული საქართველოში, რადგან ჩვენი ქვეყნისთვის მეტად რელევანტური რუსეთის მზარდი წილია, განსაკუთრებით იმპორტზე დამოკიდებულებასთან მიმართებით.
„როცა ხორბლის და ფქვილის მარაგის 95%-ზე მეტი რუსეთიდან შემოდის, როცა გაზრდილია რუსულ ნავთობპროდუქტებზე, ბუნებრივი გაზსა და ელექტროენერგიაზე დამოკიდებულება, ამ მიმართულებით რისკები გადასახედია“, - აცხადებს ირინა გურული.
იმაში, რომ ქართველი მეწარმეები ევროკავშირის ბაზარზე თავის დამკვიდრებისგან თავს იკავებენ, ირინა გურულის თქმით, გადამწყვეტ როლს პოლიტიკა და მთავრობის ეკონომიკური კურსი თამაშობს.
„ეკონომიკა პოლიტიკის გარეშე წარმოუდგენელია. სახელმწიფოს ეკონომიკური პოლიტიკა, მეტწილად მიმართულია რუსეთის ბაზრის გაფართოებისკენ. წლების განმავლობაში ვხედავთ, რომ უფრო მეტად ვხდებით დამოკიდებული რუსეთის ბაზარზე. ამასთან. ევროკავშირთან ინტეგრაციის პროცესი შეფერხებულია, ველოდებით კანდიდატის სტატუსის მიღებას, მნიშვნელოვანია გატარდეს მთელი რიგი რეფორმები, მოხდეს ევროპასთან დაახლოება, რადგან პირდაპირი უცხოური ინვესტიციების გარეშე თავისუფალი ვაჭრობის სრული პოტენციალის გამოყენება წარმოუდგენელია. ამიტომ, პირდაპირი უცხოური ინვესტიციები მნიშვნელოვანია იმისთვის, რომ მოხდეს ახალი საწარმოო შესაძლებლობების ათვისება, ახალი პროდუქციის წარმოება, რომელიც ევროპულ ბაზარს დააინტერესებს“, - აცხადებს ირინა გურული.
