დონალდ ტრამპის გადაწყვეტილებით, შტატებმა მსოფლიოს 180 ქვეყანას, საპასუხო ტარიფები დაუწესდა. პრეზიდენტის განმარტებით, აღნიშნული ტარიფების მიზანი სავაჭრო პარტნიორების მიერ აშშ-ისთვის დაწესებული ტარიფების ან სავაჭრო შეზღუდვების დაბალანსებაა. ტარიფების % ყველა ქვეყნისათვის ინდივიდუალურად განისაზღვრა. 100-ზე მეტი ქვეყნისთვის ტარიფები 10%-ით განისაზღვრა. მათ შორის არის საქართველოც. შესაბამისად, საქართველოდან აშშ-ში ექსპორტირებული საქონელი დამატებით 10%-ით დაიბეგრება.
რას გულისხმობს 10%-იანი ტარიფის დაწესება და რა გავლენას მოახდენს ეს ჩვენს ქვეყანაზე? კითხვით ეკონომიკურ ანალიტიკოსს დავით შატაკიშვილს მივმართეთ. ის ამბობს, რომ საქართველოს აშშ-ში მნიშვნელოვანი ოდენობით პროდუქტი არ გააქვს. შტატებთან ექსპორტს მთლიანი ექსპორტის მხოლოდ 2% უკავია, თუმცა მიუხედავად ამისა ამ გადაწყვეტილებას ირიბი გავლენა ექნება.
,,ჩვენზე ირიბი გავლენა ექნება. თუმცა არა ექსპორტის კუთხით. საქართველოს ექსპორტი ამერიკაში შარშან იყო 141 მლნ. დოლარი. რაც არის ჩვენი ექსპორტის დაახლოებით 2%. ძირითადად ამერიკაში გავყიდეთ ფეროშენადნობები (90 მლნ-ის), შავი ლითონის მილები და პროფილები (9 მლნ-მდე იყო), საფრენი აპარატის ნაწილები (7 მლნ) და ღვინოები (დაახლოებით 7 მლნ-ის). ჯამში ეს არის საქართველოს ექსპორტის 2%. რომ ვთქვათ, რომ 10%-იანი ტარიფი რადიკალურად შეეხება ჩვენს ექსპორტს ეს არ იქნება ასე, რადგან 2% არ არის ისეთი მონაცემი. 10%-იანი ტარიფის მიუხედავად ექსპორტი გაგრძელდება ამერიკაში ჩვეულებრივად. სხვაობა შარშანდელსა და ამ წელს შორის არ იქნება ისეთი, რომ ამან ჩვენს ექსპორტზე იმოქმედოს და შეგვეხოს.’’- განმარტავს დავით შატაკიშვილი.
რაც შეეხება იმპორტს. ამ ნაწილში გავლენა უფრო მნიშვნელოვანი იქნება, რადგან სავაჭრო პარტნიორებთან ტარიფების დაწესება შტატებში პროდუქტის ფასს გააძვირებს. საქართველოს კი ამერიკიდან გაძვირებული პროდუქციის იმპორტი მოუწევს.
,,ამერიკიდან შარშან დაახლოებით 2 მილიარდის ღირებულების პროდუქცია ვიყიდეთ და ეს ჩვენი ჯამური იმპორტის 12%-ია. ეს უფრო შეგვეხება. ამერიკაში თუ პროდუქტებზე ფასები მოიმატებს (დიდი ალბათობით მოიმატებს) მაშინ ეს ჩვენც შეგვეხება.’’- აცხადებს დავით შატაკიშვილი.
2024 წელს აშშ-ში საქართველოდან შტატებში ისეთი პროდუქციის ექსპორტი განხორციელდა, როგორიცაა: ფეროშენადნობები; შავი ლითონისგან დამზადებული მილები, მილაკები და ღრუ პროფილები; საფრენი აპარატების ნაწილები; ყურძნის ნატურალური ღვინოები; წყალბადი, ინერტული აირები და სხვა არალითონები; ხილისა და ბოსტნეულის წვენები; სპირტიანი სასმელები; ხის დაფანერებული პანელები და დაწებებული ფანერები; მინერალური და მტკნარი წყლები; ხის სამშენებლო ნაწარმი და სხვა.
