„თვალსაჩინოა მიწის მიწოდების შემცირება თბილისში, განსაკუთრებით ცენტრალურ უბნებში, რაც ახალ პროექტებზე ფასების ზრდის ბუნებრივ წნეხს ქმნის“, - ამის შესახებ G.Miller International Georgia-ს დირექტორმა ნიკოლოზ ურუშაძემ „ბიზნესპრესნიუსთან“ განაცხადა და უძრავი ქონების სექტორში არსებულ ვითარებაზე ისაუბრა.
როგორც ურუშაძე აღნიშნავს, უახლოეს პერიოდში მოსალოდნელია თბილისის უძრავი ქონების ბაზარზე ფასების ზომიერი, თუმცა სტაბილური ზრდა.
„თბილისის უძრავი ქონების ბაზარი ბოლო წლების განმავლობაში ერთ-ერთი ყველაზე დინამიკური სექტორია საქართველოს ეკონომიკაში. მიუხედავად გლობალური და რეგიონული ეკონომიკური გაურკვევლობებისა, ინვესტორების ნაწილისთვის უძრავი ქონება კვლავ რჩება ერთ-ერთ ყველაზე უსაფრთხო აქტივად. სწორედ პოლიტიკური და გეოპოლიტიკური რისკების ფონზე, ბევრი ინვესტორი უძრავ ქონებას განიხილავს როგორც კაპიტალის შესანარჩუნებელ ინსტრუმენტს, რადგან საქართველოში ალტერნატიული საინვესტიციო არხები კვლავ შეზღუდულია.
უახლოეს პერიოდში მოსალოდნელია ფასების ზომიერი, თუმცა სტაბილური ზრდა. ეს ტენდენცია არ იქნება ისეთივე დინამიკური, როგორიც 2022–2023 წლებში ფიქსირდებოდა, თუმცა ფასების ვარდნა ნაკლებად სავარაუდოა. მოთხოვნა გარკვეულწილად უკვე დაკმაყოფილდა, თუმცა სტრუქტურულად ბაზარი კვლავ დეფიციტურია. განსაკუთრებით თვალსაჩინოა მიწის მიწოდების შემცირება თბილისში, განსაკუთრებით ცენტრალურ უბნებში, რაც ახალ პროექტებზე ფასების ზრდის ბუნებრივ წნეხს ქმნის“, - აღნიშნავს რესპონდენტი.
მისივე თქმით, ბოლო პერიოდში თბილისში შეინიშნება უბნის ტიპის საცხოვრებელი პროექტების და მსგავსი ტიპის მშენებლობებზე ნებართვების მკვეთრი ზრდა.
„ყველაზე მოთხოვნადი პროდუქტი კვლავ საშუალო სეგმენტის საცხოვრებელი ბინებია. უნდა აღინიშნოს, რომ ბოლო პერიოდში შესამჩნევია მასშტაბური, უბნის ტიპის საცხოვრებელი პროექტების ზრდა. ნებართვების მოცულობა მკვეთრად გაიზარდა ამ მიმართულებით, რაც წინა წლებისთვის არ იყო დამახასიათებელი. ამასთან, იზრდება პრემიუმ სეგმენტზეც მოთხოვნა, განსაკუთრებით ცენტრალურ უბნებში, სადაც მიწოდება შეზღუდულია და ხარისხიანი პროექტების დეფიციტი აშკარად იგრძნობა“, - განაცხადა „ბიზნესპრესნიუსთან“ საუბრისას ნიკოლოზ ურუშაძემ.
