GCCA-ს მიერ დადგენილი სტანდარტით, ნებისმიერ სავაჭრო დაწესებულებაში, მოვაჭრე ვალდებულია, საქონელზე ერთეულის ფასი მიუთითოს.
ასევე, განისაზღვრა საბოლოო ფასის მითითების სტანდარტი ბარებში, რესტორნებსა და საკვებ ობიექტში. ამ ეტაპიდან, სტუმარმასპინძლობის დარგში, ნებისმიერ მენიუზე ფასი გამოთვლილი უნდა იყოს მომსახურების გადასახადის ჩათვლით და არა კონკრეტული პროცენტის მითითებით.
GCCA -ს მომხმარებელთა უფლებების დაცვის დეპარტამენტის წარმომადგენლის, ნინო ჭიჭინაძის თქმით, მოქალაქეს უფლება აქვს, კონკურენციის სააგენტოს ინფორმაციის საფუძველზე მიმართოს, ამისთვის კი აუცილებელი არ არის, დაზარალებული თავად იყოს. დამატებითი ინფორმაციისთვის კი ცხელი ხაზი ამოქმედდა: #1520.
„ფასი მომხმარებლის ეკონომიკურ ქცევას განსაზღვრავს, სწორედ ამიტომ GCCA -მ ფასის მითითებასთან დაკავშირებით 10 სტანდარტი მიიღო.
ერთეული ფასის მითითების სტანდარტი გულისხმობს, რომ მომხმარებლის თვალწინ აწონილ ან აზომილ საქონელს, მითითებული უნდა ჰქონდეს ერთეულის ფასი, იქნება ეს კილოგრამი, მეტრი თუ ლიტრი. ხშირად მომხმარებლები შეცდომაში შედიან, რადგან 100 გრამი პროდუქტის ფასი ძალიან მიმზიდველად გამოიყურება. არ აქვს მნიშვნელობა, საქონელი ფასდაკლებული იქნება თუ არა, ეს სტანდარტი ეხება ნებისმიერ პროდუქტს რომელიც აიწონება/აიზომება. რესტორნებსა და კაფე ბარებში საცნობარო მენიუში, საბოლოო ფასი უნდა იყოს მითითებული, აღნიშნული ფასი უნდა მოიცავდეს დამატებითი ღირებულების გადასახადსაც და მომსახურების გადასახადსაც.
მაგალითისთვის, კოქტეილის ფასი შეიძლება იყოს 10 ლარი, მენიუს ქვემოთ პატარა შრიფტით კი წერია, რომ ემატება დღგ-ს გადასახადი. ასეთ დროს მომხმარებელს უწევს გამოითვალოს, თუ რა თანხა გადაიხადოს.
ახალი სტანდარტით, ფასი უნდა იყოს საბოლოო, რაც მოიცავს მომსახურებას, დღგ-ს და ყველა სხვა დამატებითი გადასახადის მითითების ვალდებულებას.
თუ მომხმარებელს აქვს ინფორმაცია, რომ რომელიმე მოვაჭრე არ უთითებს საბოლოო ფასს ან ერთეულის ფასი არ აქვს მითითებული, შეუძლიათ ინფორმაციის საფუძველზე მომართონ კონკურენციის სააგენტოს და სააგენტო დაიწყებს საქმის შესწავლას. მომართვა უფასოა და შესავსები ფორმა სააგენტოს ვებგვერდზე, ონლაინაც არის ხელმისაწვდომი.
ასევე მოქმედებს ცხელი ხაზი: 1520, რომლითაც მომხმარებელს ნებისმიერი ინფორმაციის მიღება შეუძლია. საქმის დაწყების შემთხვევაში, ვადები საკმაოდ მცირეა, ეს კანონის მიღების ერთ-ერთი მიზანი იყო, რომელმაც მისი უპირატესობა განსაზღვრა. კონკურენციისა და მომხმარებლის უფლებების დაცვის სააგენტო საქმეებს, როგორც წესი, 1 თვის ვადაში განიხილავს, მაგრამ საქმის სირთულიდან გამომდინარე, შესაძლოა, 3 თვეც გაგრძელდეს“,- აღნიშნა ნინო ჭიჭინაძემ.
მომხმარებელთა უფლებების დაცვის დეპარტამენტის წარმომადგენლის ინფორმაციით, შემოსულ განცხადებებზე გადაწყვეტილება, უმრავლეს შემთხვევაში, მომხმარებლის სასარგებლოდ წყდება. რაც შეეხება მომართვიანობას, ამ მხრივ ლიდერი კვლავ დედაქალაქია, თუმცა ტენდენცია მზარდია რეგიონებშიც.
„შემოსული განცხადებების 90% მომხმარებლის სასარგებლოდ არის მიღებული, მოვაჭრეს კი ევალება მომხმარებლის დარღვეული უფლება აღადგინოს. მომართვიანობა გასული წლის იანვარ-თებერვალთან შედარებით 60%-ით არის გაზრდილი. ამ ეტაპისთვის დაახლოებით 200 განაცხადია შემოსული, ცხელმა ხაზმა კი 700-მდე ზარი დაამუშავა. განცხადებების დაახლოებით 80% თბილისზე მოდის. კონკურენციის სააგენტო ძალიან ბევრს მუშაობს ცნობიერების ამაღლების კუთხით, მარტის თვე დატვირთული იყო- ჩატარდა მომხმარებლის უფლების დაცვის საერთაშორისო კვირეული. შეხვედრები ეწყობა ეთნიკურ უმცირესობებთან, შშმ პირებთან და საგანმანათლებლო დაწესებულებებთან, ჩვენი მიზანია, რაც შეიძლება მეტმა მომხმარებელმა იცოდეს თავის უფლებებზე“,- აღნიშნა GCCA -ს მომხმარებელთა უფლებების დაცვის დეპარტამენტის წარმომადგენელმა, ნინო ჭიჭინაძემ „კომერსანტის“ ეთერში.
