ღვინის კომპანიების „ჯანიანისა“ და „ვინივერიას“ თანადამფუძნებელი გია პირადაშვილი ,,კომერსანტთან“ აცხადებს, რომ შეერთებული შტატების მიერ საქართველოსთვის 10%-იანი ტარიფის დაწესება ღვინის კომპანიებზე დიდი გავლენას ვერ მოახდენს. ბიზნესმენს ამერიკის ბაზარზე ,,ვინივერიას“ ღვინო შეაქვს. მას ორი პარტნიორი ჰყავს. გია პირადაშვილი აცხადებს, რომ ტარიფების დაწესება შტატებში ცხოვრებას გააძვირებს, თუმცა ეს ქართული ღვინის სექტორზე დიდი გავლენას არ იქონიებს. ბიზნესმენი ამერიკულ ბაზარზე ქართული ღვინის მნიშვნელოვან გაძვირებას არ ელოდება.
,,ორი პარტნიორი კომპანია გვყავს, ვისთანაც ვთანამშრომლობთ. ერთი არის კალიფორნია და სან-დიეგოში, მეორე არის აღმოსავლეთ სანაპიროზე, ნიუ-იორკი და ვაშინგტონი. არ მგონია დიდი ფასნამატი ჰქონდეს ან დიდად იმოქმედოს ამან (10%-იანმა ტარიფმა) ჩვენს პარტნიორებზე ან ჩვენი ღვინის ფასზე. პარტნიორმა ფასდაკლება რომ ითხოვოს არ არის გამორიცხული. ბიზნესია და შეიძლება პირობების გადახედვა და ამაში პრობლემას ვერ ვხედავ. ღვინის დარგზე შემიძლია გითხრათ, რომ აქ დიდი ცვლილება და დიდი მნიშვნელობა ჩვენთვის არ ექნება. ყოველ შემთხვევაში ჯერ ეგრე ჩანს. ქართულ ღვინოზე მოთხოვნის მიმართულებით ახლაც არ არიან გაგიჟებულები, რადგან ჩვენი ცნობადობა ჯერ მაინც დაბალია. ვინც იცის ჩვენი ღვინო ის მაინც მიირთმევს. აქ სხვა მომენტებია მთავარი. აქ ის კი არ არის მთავარი, რომ 10%-ით მოიმატებს იქ ფასი. გაძვირდება ამერიკაში ცხოვრება. მარტო ღვინოზე არ არის საუბარი. უკრაინასაც დაუწესეს 10% და მასთან უფროა ვაჭრობა და მათთან უფრო აისახება ეს ცვლილებები. ჩვენზე არ ექნება ისეთი გავლენა.’’- აცხადებს გია პირადაშვილი.
ბიზნესმენი ამბობს, რომ ტრამპის მიერ სხვა ქვეყნებისთვის დაწესებული მაღალი ტარიფები საქართველომ ახალ შესაძლებლობად უნდა განიხილოს. გია პირადაშვილი მიიჩნევს, რომ მაღალი ტარიფების მქონე ქვეყნებიდან წარმოების საქართველოში გადმოტანა კარგი იდეაა. უცხოელი ბიზნესმენები საქართველოში წარმოების გადმოტანით მაღალ ტარიფებს აცდებიან და ამერიკულ ბაზარზე საქართველოში წარმოებული პროდუქციით შევლენ.
,,ჩვენთვის ეს მომენტია, თუ ჩვენ ვიპოვით მწარმოებელს, ვისაც ჩვენზე დიდი 25, 40-იანი, ზოგან 90%-იანი ტარიფი აქვთ დაწესებული, შეუძლია ჩამობრძანდეს საქართველოში, გადმოიტანოს თავისი წარმოება, დააწეროს Make in Georgia და „შეუბეროს“ ბიზნესი ამერიკაში. ამისთვის არსებობს ეკონომიკისა და მდგრადი განვითარების სამინისტრო და სხვა სამინისტროები. ასეთი იდეები და ინიციატივები ამ სამსახურებმა უნდა განახორციელონ.’’- აცხადებს გია პირადაშვილი.
