„სახელმწიფო შპს „ენგურჰესიდან“, რეორგანიზაციის ფორმით, 400-დან 500-მდე თანამშრომლის გათავისუფლებას აპირებენ“ - აღნიშნული ინფორმაცია BMG-ის სახელმწიფო კომპანიაში დასაქმებულმა რამდენიმე ადამიანმა მიაწოდა.
„ენგურჰესის“ თანამშრომლები, რომლებიც BMG-ის ანონიმურობის დაცვის პირობით დაუკავშირდნენ, აცხადებენ, რომ სახელმწიფომ კომპანიაში დანიშნა ახალი ფინანსური დირექტორი ირაკლი ინაშვილი, რომელსაც რეორგანიზაციის ფორმით კომპანიიდან 500-მდე დაქირავებულის გათავისუფლება დაევალა.
„ამ ყველაფერს აქვს იძულებითი ფორმა და აიძულებენ, [აპრილის ბოლომდე], თავიანთი ნებით დაწერონ განცხადება წასვლის შესახებ, ყოველგვარი ანაზღაურების გარეშე... გეოპოლიტიკური გარემოების გათვალისწინებით, რეორგანიზაციის ფორმით მასობრივად გათავისუფლების საკითხი არ შეიძლება განიხილოს მხოლოდ ადმინისტრაციულ ან ფინანსურ კონტექსტში, რადგან ეს არის ეროვნული მნიშვნელობის საკითხი.
მოგეხსენებათ, შპს „ენგურჰესის“ გენერატორები და მთავარი სამუშაო ნაწილი და ტურბინები მდებარეობს გალის რაიონში, სოფელ საბერიოში, აფხაზეთის მიერ კონტროლირებად ტერიტორიაზე და ამჟამად არის ერთადერთი ობიექტი ოკუპირებულ ტერიტორიაზე, სადაც მოქმედებს ქართული კანონმდებლობა და რის გამოც ომის პერიოდში უამრავი ადამიანი სიცოცხლის ფასად დაბრუნდა თავიანთი ეროვნების შესანარჩუნებლად სახლში“, - განუცხადა bm.ge-ის ერთ-ერთმა ადგილობრივმა, რომელიც „ენგურჰესშია“ დასაქმებული და იქვე დასძინა, რომ „ენგურჰესში“ დასაქმებული 1 100-მდე ადამიანიდან, 70%-80% აფხაზეთის კონტროლირებად ტერიტორიაზე ცხოვრობს.
მისი თქმით, სახელმწიფო საწარმოში დასაქმებულები, ობიექტური მიზეზების გამო, თავს იკავებენ იდენტიფიცირებისგან, მაგრამ საქართველოს მთავრობას მიმართავენ და მოუწოდებენ, გაითვალისწინონ, რომ ეს გადაწყვეტილება სცდება მხოლოდ ეკონომიკურ და ადმინისტრაციულ ფორმებს.
ვრცლად: bm.ge
