„დავბრუნდი იმისთვის, რომ Rooms-ის სასტუმროების ქსელი გამოვიყვანოთ „აჭარა ჯგუფიდან“ - ამის შესახებ, რადიო „კომერსანტის“ გადაცემაში, „კომერსანტის დილა“ Rooms Hotels - ის აღმასრულებელმა დირექტორმა ვალერი ჩეხერიამ განაცხადა. მისი თქმით Rooms Hotels-ი მთელ მსოფლიოში ცნობილი და სასტუმროების ბაზარზე პოპულარული ბრენდია.
„ჩვენი სასტუმროების ქსელის დამფუძნებელი თემურ უგულავაა, „აჭარა ჯგუფში“ რამდენიმე მიმართულებაა, ერთ-ერთია სოფლის მეურნეობის ნაწილი, რომელიც საკმაოდ დიდი და ძლიერი მიმართულებაა, მეორე ბრენდის სასტუმრო „ფაბრიკა“ გვაქვს და ასევე გვაქვს „სტამბა“, რომელიც ამ შემთხვევაში ორ ნაწილად გავყავით და Rooms hotels-ის მიმართულებით ვარ ხელმძღვანელი და CEO.“ - აღნიშნა ვალერი ჩეხერიამ.
ჩეხერიას თქმით, დღეის მდგომარეობით Rooms Hotels სამი სასტუმრო აქვს, ესენია Rooms Kazbegi, Rooms Tbilisi და „რუმს კოხტა ბაკურიანი“.
„ძალიან მალე აგვისტოში ბათუმში ახალი სასტუმროთი შევდივართ, მომავალ წელს გვინდა, რომ აბასთუმნის პროექტი, რომელიც დაწყებული გვაქვს და აქტიური სარემონტო სამუშაოები მიმდინარეობს დავასრულოთ. ამის შემდეგ საქართველოში 5 პროექტით ვიქნებით წარმოდგენილები და არც ამაზე ვაპირებთ გაჩერებას, გვინდა, რომ რამდენიმე რეგიონი შეემატოს რუმსის სასტუმროების ქსელს და შემდეგ ქვეყნიდანაც გავიდეთ, რადგან საქართველოს ფარგლებს გარეთ ეს ბრენდი ძალიან პოპულარულია და როდესაც აშშ-ში და ევროპაში ვცხოვრობდი, ამაში ნამდვილად დავრწმუნდი“ - აღნიშნა ვალერი ჩეხერიამ.
