2023 წლის პირველ კვარტალში საცხოვრებელი უძრავი ქონების ფასები გაიზარდა, კერძოდ, „საქსტატის“ მონაცემებით, ინდექსის (RPPI) წლიურმა ზრდამ 10.7 % შეადგინა, 2020 წლის საშუალოსთან შედარებით კი, ფასები 25.1%-ითაა გაზრდილი.
Georealty-ის დამფუძნებელი, რეალტორთა ასოციაციის ერთ-ერთი დამფუძნებელი, მაია გამზარდია „კომერსანტთან“ ამბობს, რომ ბიუჯეტური სეგმენტის ბინებზე იჯარის მაღალი ფასები ნარჩუნდება, შუალედური იაფდება, ხოლო პრემიუმ კლასზე მოთხოვნა ყოველთვის არის და დეფიციტურია.
„ფასებთან დაკავშირებით ნახტომისებური ზრდა არ გვაქვს, თუმცა მაღალი ფასები შენარჩუნებულია როგორც იჯარის ნაწილში, ასევე გაყიდვებში. ბოლო პერიოდში იჯარის ნაწილში ფასები შემცირებისკენ წავიდა, ალბათ აღარ არის ძალიან დიდი მოთხოვნა და ამიტომ, თუმცა ეს სხვადასხვა სეგმენტზე ძალიან განსხვავებული და ცვალებადია. მაგალითად პრემიუმ კლასზე ყოველთვის არის მაღალი მოთხოვნა მაღალი ფასით და დეფიციტია. ბიუჯეტური სეგმენტის ბინებზე მოთხოვნა და ფასები ბევრად უფრო ზრდადი იყო და ინარჩუნებს თავის პოზიციებს, რაც შეეხება შუალედურ სეგმენტს, აქ ფასები ქვემოთ ჩამოვიდა და მცირედით, მაგრამ იაფდება.
უცხოეთის მოქალაქეების მხრიდან საქართველოში ბინების დაქირავების ტემპი შენელებულია, სწორედ ამას ჰქონდა გავლენა ფასებზეც.
რაც შეეხება გაყიდვებს, აქაც მსგავსი ვითარებაა. საცხოვრებელი უძრავი ქონება დიდი რაოდენობით არის გაყიდული თბილისშიც და ბათუმშიც. ერთ ადამიანს შეძენილი აქვს რამდენიმე უძრავი ქონება, ჩემი აზრით, ეს იმას ნიშნავს, რომ მათ ეს ფართები მხოლოდ საცხოვრებლად არ სჭირდებათ“, - აღნიშნავს მაია გამზარდია.
„თიბისი კაპიტალის“ მონაცემებით, 2023 წლის მარტში საცხოვრებელი უძრავი ქონების ბაზარზე გაყიდული ბინების რაოდენობა თებერვლის მაჩვენებელს 2%-ით ჩამორჩა. თბილისში სულ 3,328 ტრანზაქცია დაფიქსირდა, რაც 7%-ით ნაკლებია წინა წლის იმავე პერიოდთან შედარებით. ამავდროულად, საშუალო გასაყიდმა ფასმა ზრდა განაგრძო და 1,153$-ს გაუტოლდა, რაც 39%-ით აჭარბებს 2022 წლის მარტის და 1.5%-ით წინა თვის მაჩვენებელს. ფასების ზრდის ხარჯზე ბაზრის ზომა წლიურად 34%-ით გაიზარდა და 261$ მილიონი შეადგინა.
