ბოლო დღეებში სხვადასხვა სოციალურ ქსელში გავრცელდა დაუზუსტებელი ინფორმაცია, თითქოს„ალტა“-სთვის შექმნილი AI კონტენტ კრეატორი„ანო“ ეფუძნება კონკრეტული პირის ვიზუალურ მონაცემებს, რომელთანაც კომპანიამ შეწყვეტა ხელშეკრულება და შემდეგ AI მოდელით ჩაანაცვლა.
კომპანია „ალტა“ ოფიციალურად აცხადებს, რომ აღნიშნული ინფორმაცია არის მცდარი და არ შეესაბამება სიმართლეს.
AI კონტენტ კრეატორი „ანო“ შექმნილია პარტნიორი სააგენტოს მიერ, რომელმაც ოფიციალურად დაგვიდასტურა, რომ მოდელის შექმნის პროცესში არ გამოყენებულა არც ერთი კონკრეტული პირის ფოტო, სახე, ხმა ან სხვა ბიომეტრიული მონაცემი.
ასევე, „ალტა“-ს მხრიდან არ არსებობს არც ერთი მითითება, ან დავალება, რომ ავატარი დაეფუძნებინათ კონკრეტული ადამიანისთვის დამახასიათებელ გარეგნობაზე, მიმიკასა, თუ ჟესტიკულაციაზე.
„ანო“-ს შექმნის მიზანი იყო ქართულ ბაზარზე ინოვაციური ტექნოლოგიური პროდუქტის წარმოდგენა და არა რეალური ადამიანების ჩანაცვლება.
რაც შეეხება ხელშეკრულების დარღვევის შესახებ დეზინფორმაციას: აღნიშნული პიროვნება არასდროს ყოფილა “ალტა”-ს თანამშრომელი, ან ბრენდ ამბასადორი. ვიდეორგოლები აღნიშნული პიროვნების მონაწილეობით დამზადებულია სხვა პარტნიორი სააგენტოს მიერ. მასთან კომპანია“ალტა”-ს მხრიდან არანაირი ხელშეკრულება არ დადებულა, არ შეწყვეტილა და, შესაბამისად, არც დარღვეულა.
ჩვენთვის მნიშვნელოვანია მაღალი სტანდარტების დაცვა, გამჭვირვალობა და სამართლიანობა. ყველა ფაქტი, რომელიც აღწერილია, გადამოწმებულია შესაბამის მხარეებთან და დადასტურებულია ოფიციალური დოკუმენტაციით.
აღნიშნული პირის მიერ „ალტა“-ს მიმართ გავრცელებულმა შეურაცხმყოფელმა და ცილისმწამებლურმა განცხადებებმა მიიღო კამპანიური ხასიათი. გამომდინარე აღნიშნულიდან კომპანია „ალტა“ აცხადებს, რომ მსგავსი ქმედებები ზიანს აყენებს კომპანიის საქმიან რეპუტაციას და ჩვენი მხრიდან მოჰყვება შესაბამისი სამართლებრივი რეაგირება.
