აშშ-ს პრეზიდენტის, დონალდ ტრამპის მიერ 2 აპრილს, როგორც ის უწოდებს, "გათავისუფლების დღეს" 180-ზე მეტ ქვეყანაზე, სულ მცირე, 10%-იანი ტარიფის დაწესების შედეგად, აშშ-ს საფონდო ბირჟამ მკვეთრი ვარდნა განიცადა. დანაკარგების მოცულობა დაახლოებით 5.4 ტრილიონ დოლარს შეადგენს.
აშშ-ს ფლაგმანური ინდექსი S&P 500, გუშინ 4.8%-იანი კლების შემდეგ, დღეს 6%-იანი ნიშნულით შემცირდა.
როგორც Financial Times წერს, ტრამპის ტარიფებმა ინვესტორების თავდაჯერებულობა შეარყია და რეცესიის შიშები გააჩინა.
ყოველივე ამას ხელი შეუწყო ჩინეთის მიერ აშშ-სთვის 34%-იანი საპასუხო ტარიფის დაანონსებამაც.
გამოცემის ცნობით, როგორც ანალიტიკოსები ამბობენ, თუ 9 აპრილისთვის ტრამპი თანაბარ საპასუხო ტარიფებს არ გაიწვევს, აშშ-სა და ევროკავშირში, სავარაუდოდ, რეცესია დაიწყება.
"თუკი ეს გლობალური სავაჭრო ომი ძალიან მალე არ დასრულდება, ჩვენ ვფიქრობთ, რომ მიმდინარე წელს აშშ-ში რეცესია იქნება". - თქვა ერთ-ერთმა მკვლევარმა Financial Times-თან საუბრისას.
ამერიკული ფინანსური სერვისების კომპანია JPMorgan-ის ანალიტიკოსების მიერ დათვლილი რისკი გლობალური რეცესიისა, მიმდინარე წელს 60%-მდე გაიზარდა, განსხვავებით აქამდე პროგნოზირებული 40%-ისა.
საფონდო ბირჟაზე მკვეთრი ვარდნის გარდა, ტრამპის "გათავისუფლების დღემ" ამერიკული დოლარის სხვა მოწინავე ვალუტებთან მიმართებით შედარებით გაუფასურება და გლობალურად ნედლი ნავთობის ფასის მნიშვნელოვნად შემცირებაც გამოიწვია.
წყარო: tabula.ge
საფონდო ბირჟამ თავისი სიტყვა თქვა, - ამის შესახებ ჩინეთის საგარეო საქმეთა სამინისტროს წარმომადგენელმა, გუო ძიაკუნმა სოციალურ ქსელში დაწერა.
„სავაჭრო და სატარიფო ომი, რომელიც აშშ-მა მთელი მსოფლიოს წინააღმდეგ წამოიწყო, არაპროვოცირებული და გაუმართლებელია. დროა, აშშ-მა არასწორი ქმედებები შეწყვიტოს და სავაჭრო პარტნიორებთან უთანხმოება კონსულტაციების გზით მოაგვაროს“, - წერს ჩინეთის საგარეო საქმეთა სამინისტროს წარმომადგენელი.
ცნობისთვის, 2 აპრილს დონალდ ტრამპმა აშშ-ში იმპორტირებულ ყველა სახის ჩინურ საქონელზე დამატებითი 34%-იანი ტარიფები გამოაცხადა, რასაც 4 აპრილს ჩინეთმა 34%-იანი ტარიფებით უპასუხა, რომელიც ძალაში 10 აპრილიდან შევა.
ჩინეთის მიერ საპასუხო ტარიფების გამოცხადებას აშშ-ის პრეზიდენტი გამოეხმაურა და აღნიშნა, რომ „ჩინეთმა არასწორად იმოქმედა და პანიკაში ჩავარდა“.
აშშ-ის პრეზიდენტის, დონალდ ტრამპის მიერ გამოცხადებული ტარიფებისა და ჩინეთის საპასუხო ნაბიჯის შემდეგ გლობალურ საფონდო ბირჟებზე აქციების ფასები დაეცა და კომპანიებმა „კოვიდ-19“-ის პანდემიის შემდეგ ყველაზე დიდი ზარალი განიცადეს. პარასკევს S&P 500-ის ინდექსი 9%-ით დაეცა. J.P.Morgan-ის პროგნოზით, 2025 წელს აშშ-სა და გლობალური რეცესიის შანსები 60%-მდე გაიზარდა.
მსოფლიოს 500-მა უმდიდრესმა ადამიანმა ბოლო 2 დღის განმავლობაში ნახევარ ტრილიონზე მეტი დოლარი დაკარგა - ამის შესახებ ინფორმაციას გამოცემა Bloomberg ავრცელებს.
გამოცემის ცნობით, მას შემდეგ, რაც აშშ-ის პრეზიდენტმა, დონალდ ტრამპმა მსოფლიოს სხვადასხვა ქვეყნებს ტარიფები დაუწესა, ყველაზე მდიდარმა ადამიანებმა 536 მილიარდი დოლარი დაკარგეს. Bloomberg წერს, რომ პრეზიდენტის ახალმა პოლიტიკამ საფონდო ბირჟებზე პანიკა გამოიწვია, რასაც აქციების ფასების მკვეთრი დაცემა მოჰყვა.
10,5%-ით დაეცა აშშ-ის წამყვანი საფონდო ინდექსი S&P 500, რომელიც 500 ყველაზე წარმატებულ ამერიკულ კომპანიას აერთიანებს. ასევე, 11,4%-ით გაუფასურდა Nasdaq-ის საფონდო ინდექსიც, რომელიც ჯამში რამდენიმე ათას ტექნოლოგიურ კომპანიას აერთიანებს.
ტარიფებთან დაკავშირებით ჩემი პოლიტიკა არასდროს შეიცვლება, – ამის შესახებ აშშ-ის პრეზიდენტმა, დონალდ ტრამპმა საკუთარ სოციალურ ქსელში დაწერა.
„მივმართავ ბევრ ინვესტორს, რომლებიც შემოდიან შეერთებულ შტატებში და დებენ უზარმაზარ თანხებს, ჩემი პოლიტიკა არასოდეს შეიცვლება. ეს არის შესანიშნავი დრო, რომ გამდიდრდე უფრო მეტად, ვიდრე ოდესმე“, – წერს ტრამპი.
